Дар Москва ҷаласаи XXVII Шӯрои роҳбарони агентиҳои давлатии иттилоотии ИДМ баргузор гардид
МОСКВА, 25.11.2019 /АМИТ «Ховар»/. Имрӯз дар қароргоҳи ТАСС дар пойтахти Россия – шаҳри Москва ҷаласаи XXVII Шӯрои роҳбарони агентиҳои давлатии итилоотии ИДМ баргузор гардид. Дар кори он узви Шӯро, директори АМИТ «Ховар» Саидалӣ Сиддиқ ширкат варзид.
Дар ҷаласа ҳамчунин роҳбарони агентиҳои иттилоотии «АзерТаҷ»-и Озарбойҷон А. Асланов, «Арменпресс»-и Арманистон А. Ананян, «БелТА»-и Беларус И. Акулович, «Кабар»-и Қирғизистон К. Таабалдиев, «УзА»-и Ӯзбекистон А. Кучимов, муовини аввали директори генералии ТАСС М. Гусман, сармуҳаррири «Казинформ»-и Қазоқистон Б. Танелбаева, директори Раёсати робитаҳои байналмилалии ТАСС О. Островидов, сардори бахши кишварҳои ИДМ ва Балтика Б. Грушин ва директори Раёсати иттилоотию таҳлилии Кумитаи иҷроияи ИДМ А. Заварзин иштирок намуданд.
Ҷаласа таҳти роҳбарии раиси Шӯро, директори генералии ТАСС Сергей Михайлов сурат гирифт. Дар он масоили вобаста ба омодагӣ ба таҷлили 75-солагии Ғалаба дар Ҷанги Бузурги Ватании солҳои 1941-1945 баррасӣ шуд.
«Ин ҷашни умумии мост, ки ба хотири он халқҳои моро зарур омад ҳуқуқи зиндагии наслҳои ояндаро ҳимоя кунанд. Мо ҳақ надорем, ки ҷасорати бузурги онҳоеро, ки дар шадидтарин ҷанг дар таърихи инсоният ғалаба кардаанд, фаромӯш созем», — гуфт Сергей Михайлов.
Михайлов таъкид кард, ки агентиҳои иттилоотӣ барои ба наслҳои имрӯза ва оянда расонидани таърих, сабақҳо ва арзишҳои айёми ҷанг, хотираи қаҳрамононаи ҳамдиёронамон ва амалҳои ваҳшиёнаи фашизм дорои иқтидори эҷодӣ ва техникӣ мебошанд.
Ӯ ҳамчунин иттилоъ дод, ки ТАСС намоишгоҳи густурдаи аксҳоро таҳти унвони «Матбуот дар ҷанг» омода мекунад, ки аз аксҳои хабарнигорони агентиҳо ва бойгонӣ иборат хоҳад буд. Михайлов ҳозиринро даъват кард, ки ба ташкили ин чорабинӣ ҳамроҳ шаванд ва дар пайдо намудани аксҳои нодири замони ҷанг кумак намоянд. Намоишгоҳ дар толори марказии намоишҳои «Манеж»-и Москва баргузор мешавад.
Баромадкунандагон лоиҳаҳои махсусро, ки ба мавзӯи Ғалабаи Бузург бахшида шудаанд, тавзеҳ доданд.
Доир ба ҳамкории агентиҳои ИДМ дар инъикоси ҷашни 75-солагии Ғалаба мувофиқа ҳосил шуд.
Ёдовар мешавем, ки Шӯрои иттилоотии ИДМ моҳи ноябри соли 1995 бо қарори сарвазирони давлатҳои иштирокчии ИДМ таъсис ёфтааст. Ба ҳайати он роҳбарони агентиҳои давлатии иттилоотии Озарбойҷон, Арманистон, Беларус, Қазоқистон, Қирғизистон, Молдова, Россия ва Тоҷикистон шомил мебошанд.
Фаъолияти Шӯрои иттилоотии ИДМ ба таъмини ҳамгироӣ ва ҳамкории давлатҳои аъзои ИДМ дар соҳаи иттилоот, фароҳам овардани шароити мусоид барои интишори бемамониати иттилоот ва табодули самараноки таҷрибаи фаъолияти касбӣ, инчунин таҳкими шарикии иттилоотӣ равона карда шудааст.
Ҷаласаи навбатии Шӯро моҳи марти соли 2020 дар шаҳри Бокуи Озарбойҷон баргузор мешавад.
ДАР АКС: аз рост ба чап — роҳбарони агентиҳои иттилоотии «АзерТаҷ» А. Асланов, «Ховар» С. Сиддик, «УзА» А. Кучимов ва муҳаррири пешбари «УзА» И. Абдухолиқов. Акс аз ТАСС.
ДАР АКС: директори АМИТ «Ховар» Саидалӣ Сиддиқ бо муҳаррири пешбари «УзА», собиқ мухбири Телевизиони марказӣ (ИҶШС) дар Ӯзбекистон Ирисмат Абдухолиқов суҳбат дорад. Акс аз ТАСС.
ДАР АКС: иштирокдорони ҷаласаи XXVII Шӯрои роҳбарони агентиҳои давлатии иттилоотии ИДМ, 25 ноябри соли 2019. Қароргоҳи ТАСС дар Москва. Акс аз ТАСС.
Президенти Комиссияи Иттиҳоди Аврупо Урсула фон дер Ляйен аз иқтидори бузурги Неругоҳи азими барқи обии «Роғун»-и Тоҷикистон ёдовар шуд
Президенти Тоҷикистон тавсеаи ҳамкории давлатҳои Осиёи Марказиро бо Иттиҳоди Аврупо дар соҳаи энергетикаи «сабз» аз самтҳои ояндадор номиданд
Эмомалӣ Раҳмон: «Пиряхҳои Тоҷикистон танҳо манбаи об барои минтақа набуда, дар нигоҳдории иқлими минтақа низ нақши муҳим мебозанд»
Инъикоси густурдаи таҷлили Ҷашни байналмилалии Наврӯз бо иштироки Сарони се давлати Осиёи Марказӣ дар расонаҳои хабарии минтақаю ҷаҳон ва шабакаҳои иҷтимоӣ
Эмомалӣ Раҳмон: «Натиҷаҳои вохӯриҳои имрӯзаро мо ҳамчун пайки таҷдид ва оғози марҳилаи сифатан нав дар муносибатҳои се кишвар медонем»
Президенти Тоҷикистон: «Худдорӣ намудан аз ҳама гуна зиёдаравию исрофкорӣ вазифаи ҳар бандаи муъмин дар ҳама ҳолат, аз ҷумла дар айёми ид мебошад»
23 март-Рӯзи ҷаҳонии обуҳавошиносӣ. Дар ҳар се соат ҳавошиносони тоҷик ба Хадамоти ҷаҳонии ҳавошиносӣ маълумот пешниҳод менамоянд
«НАВРӮЗ ДАР АСЛ ҶАШНИ ЗИНДАГИСОЗ АСТ». Иқтибос аз суханрониҳои Президенти Ҷумҳурии Тоҷикистон
ИМРӮЗ-РӮЗИ БАЙНАЛМИЛАЛИИ ҲИФЗИ ПИРЯХҲО. Ҳифзи пиряхҳо аз обшавии босуръат ҳамкории дастҷамъонаи давлатҳо ва созмонҳои байналмилалиро тақозо менамояд
Пешвои миллат: «Тоҷикистони маҳбуби мо воқеан Ватани аслии Наврӯз аст»
Бузургии Зан-Модар- ин олиҳаи ҳаёт ҳамеша вирди забони башарият аст
Рӯзи Модар рамзи эҳтиром ва қадршиносии махсуси давлату ҳукумати Тоҷикистон нисбат ба Зан-Модар мебошад
