2000000 ТОННА! Дар Тоҷикистон ҳаҷми истихроҷи ангишт ба чунин миқдор расонида шуд

ДУШАНБЕ, 19.12.2019 /АМИТ «Ховар»/. Истихроҷи ангишт дар ҷумҳурӣ  ба зиёда аз  2 миллион тонна расонида шудааст, ки ин нишондиҳандаи баландтарин дар таърихи Ҷумҳурии Тоҷикистон мебошад. Дар ин бора ба хабарнигори АМИТ «Ховар» Мавҷуда АНВАРӢ дар Корхонаи воҳиди давлатии «Ангишти Тоҷик»-и Вазорати саноат ва технологияҳои нави Ҷумҳурии Тоҷикистон хабар доданд.

 Ба иттилои манбаъ, ин нишондиҳанда нисбат ба соли 2000-ум 100 маротиба зиёдтар мебошад. Зикр гардид, ки талаботи истифодабарандагон -корхонаҳои саноатӣ-энергетикӣ ва хоҷагии халқ пурра бо ангишт таъмин карда шудааст.

Мавриди зикр аст, ки  дар Тоҷикистон  КФ «Шахтаи Фон-Яғноб», Департаменти истихроҷи ангишти ҶДММ «Корхонаи металлургии Тоҷик», ҶДММ «Талко- Ресурс», КФ «Зиддӣ»  ва   дигар корхонаҳо  ба истихроҷи ангишт машғуланд.

Бино ба маълумоти Вазорати саноат ва технологияҳои нави Ҷумҳурии Тоҷикистон,   соли ҷорӣ аз Тоҷикистон  ба Ӯзбекистон ва  Покистон ангишт содирот карда шудааст.

Ҳар сол дар дунё садҳо миллион тонна ангишт истеҳсол карда мешавад. Дар ҷаҳон Чин, ИМА, Ҳиндустон, Австралия ва Индонезия, дар байни кишварҳои ИДМ Россия, Украина ва Қазоқистон  аз ҳама бештар ангиштсанг истеҳсол ва содирот менамоянд. Ангишт яке аз захираҳои қадима ва маъмули энергетикӣ дар ҷаҳон маҳсуб ёфта, талабот ба он сол то сол меафзояд (ниг. ба ҷадвали поён).