23 декабр Иҷлосияи бисту дуюми Маҷлиси вакилони халқи шаҳри Душанбе баргузор мегардад

ДУШАНБЕ, 12.12.2019 /АМИТ «Ховар»/. 23 декабр дар пойтахт  Иҷлосияи бисту дуюми Маҷлиси вакилони халқи шаҳри Душанбе, даъвати панҷум доир мегардад. Дар ин бора қарори Раиси шаҳри Душанбе Рустами Эмомалӣ ба имзо расид.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе  ба АМИТ «Ховар» хабар доданд, дар иҷлосияи мазкур  ҳисоботи Раиси шаҳри Душанбе «Оид ба натиҷаҳои рушди иҷтимоию иқтисодии шаҳри Душанбе дар ёздаҳ моҳи соли 2019» шунида шуда, лоиҳаи қарорҳо «Дар бораи лоиҳаи буҷети шаҳри Душанбе, барои соли 2020 ва тасдиқи иҷрои буҷети шаҳри Душанбе дар соли 2018», «Дар бораи вазъи иҷрои барномаҳои давлатӣ ва нақшаи чорабиниҳои мақомоти иҷроияи ҳокимияти давлатии шаҳри Душанбе дар соҳаи кор бо занон ва оила», «Дар бораи натиҷаҳои фаъолияти Маҷлиси вакилони халқи шаҳри Душанбе, даъвати панҷум», инчунин  тасдиқи қарорҳои Раиси шаҳри Душанбе  мавриди баррасии вакилон қарор мегиранд.

Тибқи иттилои манбаъ, барои омода намудани масъалаҳои рӯзномаи иҷлосия гурӯҳи корӣ таъсис дода  мешавад.

«Тибқи қарори дахлдор, вакилони Маҷлиси вакилони халқи шаҳри Душанбе, даъвати панҷум  аз 11 то 21 декабри соли 2019 дар ҳавзаҳои интихоботӣ бо интихобкунандагон вохӯриҳо баргузор намуда, аз натиҷаи онҳо ба гурӯҳи корӣ оид ба такмил додани масъалаҳои рӯзномаи иҷлосияи бисту дуюми Маҷлиси вакилони халқи шаҳри Душанбе, даъвати панҷум пешниҳодҳои мушаххас манзур менамоянд»,-афзуд манбаъ.

Ҳамчунин Раёсати иттилоот ва робитаҳои хориҷии дастгоҳи Раиси шаҳри Душанбе бо тартиби муқарраршуда муҳтавои қарори мазкурро тавассути воситаҳои ахбори омма ба самъи сокинони пойтахт расонида, таклифу пешниҳодҳои вобаста ба иҷлосия воридгардидаро ба гурӯҳи корӣ манзур месозад.