Кӯлоб: афзоиши истеҳсоли моҳӣ дар хоҷагии моҳипарварии «Зеҳнӣ»

ДУШАНБЕ, 12.12.2019 /АМИТ «Ховар»/. Хоҷагии моҳипарварии «Зеҳнӣ» дар Ҷамоати деҳоти Даҳанаи минтақаи Кӯлоб ҳамасола истеҳсоли моҳиро зиёд менамояд. Ба гуфти масъулини ҷамоати деҳот, хоҷагидорон барои беҳтар намудани вазъи иқтисодии хоҷагӣ ва фароҳам овардани шароити истироҳат барои сокинон дар Солҳои рушди деҳот, сайёҳӣ ва ҳунарҳои мардумӣ дар ин мавзеъ истироҳатгоҳ ташкил намудаанд. Дар он меҳмонону сокинони шаҳр метавонанд дар ҳама фасли сол бо шаст моҳидорӣ намуда, вақти холии хешро бофароғат гузаронанд.

Ин хоҷагӣ низ чун дигар хоҷагиҳои моҳипарварии шаҳри Кӯлоб аз надоштани замини кишт барои тайёр кардани хӯроки моҳӣ мушкилӣ мекашад. Ҳар сол барои парвариши як моҳӣ аз  8 то 10  сомонӣ хӯрокӣ харидорӣ мекунанд, ки ба буҷети хоҷагӣ зарари калон меорад. Дар ҳавзҳои ин хоҷагӣ се намуди моҳӣ парвариш карда мешаванд.

Бо тавсияи мутахассисон, шурӯъ аз моҳи март моҳича харида, дар ҳавзҳо парвариш мекунанд ва моҳҳои ноябр-декабр онро ба савдо мебароранд. Имсол хоҷагии Зеҳнӣ нақшаи дурнамои истеҳсоли моҳиро иҷро кард. Соли оянда моҳипарварон мақсад доранд ин нишондиҳандаро ба ду баробар расонанд.

Қабули барномаҳои давлатӣ дар самти рушди соҳаи моҳипарварӣ ва додани имтиёзҳо ба хоҷагиҳои моҳипарварӣ солҳои охир ҳавасмандии онҳоро зиёд кардааст. Ин аст, ки дар шаҳру ноҳияҳо шумораи хочагиҳои моҳипарвар афзоиш ёфта, дастрасии сокинонро ба гӯшти парҳезии моҳӣ таъмин менамояд.

Дар ҳамин замина, моҳипарварони минтақаи Кӯлоб дар таъмини сокинони мамлакат бо гӯшти парҳезӣ, алалхусус гӯшти моҳӣ ва коҳиш додани воридоти ин маҳсулот аз хориҷи мамлакат худро саҳмдор медонанд. Бинобар ин, барои расидан ба ин мақсад хоҷагиҳои моҳипарварӣ, ки соҳиби имтиёзҳои зиёд шудаанд, майдони ҳавзҳои моҳиро зиёд карда, истеҳсоли маҳсулотро афзоиш медиҳанд.