Консерти идона дар майдони «Дӯстӣ»-и Душанбе

Декабрь 31, 2019 21:36

ДУШАНБЕ, 31.12.2019 /АМИТ «Ховар»/. Шоми имрӯз бо ибтикори мақомоти иҷроияи ҳокимияти давлатии шаҳри Душанбе бахшида ба  фарорасии Соли нави мелодии 2020 дар майдони  «Дӯстӣ»-и  пойтахт шоу-консерти идонаи солинавӣ баргузор гардид.  Дар барномаи консертӣ санъаткорони   маъруфи  тоҷик, аз ҷумла Сангалӣ Мирзоев, Шабнами Сурайё, Ҳуҷаста Мирзовалиева, Фотима Машрабова, Шуҳрат Сайнаков, Дилшод Файзуллоев, Хайриддин Шарифов, Иззат Шарифӣ, Чоршанбе Аловатов ва дигарон  иштирок намуда,  бо  таронаҳои ҷолиб   хотири иштирокдоронро болида гардониданд.

Пеш аз оғози консерти идона муовини якуми Раиси шаҳри Душанбе Маҳмадсаид Зувайдзода Паёми шодбошии Раиси шаҳри Душанбе муҳтарам Рустами Эмомалиро ба муносибати фарорасии Соли нави мелодӣ  ба сокинону меҳмонони пойтахт расонид.

Номбурда зикр кард, ки   «соли рафта барои хурду бузурги мамлакат воқеан ҳам соли таърихиву бобарор буд. Дар ин сол   як қатор иқдомҳои наҷиб  амалӣ гардиданд.  Аз ҷумла,  бисту ҳаштумин солгарди Истиқлолияти давлатиро   бо шукӯҳи хосса таҷлил  намуда,   барои  ҷашни сазовори  30-солагии он як зумра тадбирҳои муассир роҳандозӣ намудем, ки  ба боз ҳам ободу зебо гардидани Тоҷикистон мусоидат намуд».

Таъкид гардид, ки дар ин сол мардуми заҳматқарину сарбаланди Душанбе бо фаъолияти аҳлонаву содиқонаи худ ба раванди пешрафту тараққиёти сарзамин  вусъати тоза бахшида, барои фардои боз ҳам ободу осудаи он заминаҳои мусоид ва пойдевори устувор гузоштанд.

Зикр гардидки солҳои охир шаҳри Душанбе ҳамчун пойтахти Ҷумҳурии Тоҷикистон таҳти роҳнамоиву дастгириҳои бевоситаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон симои зебову замонавӣ касб намуда, ба маркази бузурги баргузории чорабиниҳои умумиҷаҳонии сиёсиву фарҳангӣ табдил гардидааст, ки ҷиҳати боз ҳам шуҳратёр гардидани он дар арсаи байналмилалӣ мусоидат менамояд.

Пас аз табрикоти роҳбарияти шаҳр санъаткорони ҷавону соҳибистеъдоди ҷумҳурӣ  барномаи  идонаро идома бахшиданд.

Ёдовар мешавем, ки бо мақсади дар сатҳи баланд таҷлил намудани Соли нави мелодии 2020 ва ҷиҳати фароҳам овардани шароити мусоиди истироҳату фароғати сокинон ва меҳмонон пойтахти мамлакат- шаҳри Душанбе ба худ симои идона ба бар намуда, бо ташаббуси роҳбарияти мақомоти иҷроияи ҳокимияти давлатии шаҳри Душанбе марказ ва дигар маҳалҳо ба шаҳри афсонаҳо табдил дода шудаанд.

Баҳри иштирок дар тантанаҳои идона сокинони синну соли гуногун дар марказ ва дигар ҷойҳои ҷамъиятии шаҳр ҷамъ омада, бо шукргузорӣ аз фазои сулҳу ваҳдат ва оромиву муттаҳидии Ватан фарорасии Соли нави мелодиро таҷлил карданд.

Хотиррасон мешавем, ки чорабиниҳои фарҳангӣ-фароғатӣ бахшида ба фарорасии соли нави мелодии 2020 дар чор ноҳияи пойтахт, аз ҷумла ноҳияи Шоҳмансур дар майдони 800-солагии Москва, ноҳияи Исмоили Сомонӣ дар Боғи фарҳангу фароғатии ба номи Садриддин Айнӣ, ноҳияи Фирдавсӣ дар саҳни майдони назди Сирки давлатии Тоҷикистон ва ноҳияи Сино дар майдони Синои пойтахт бо иштироки ҳунармандону эҷодкорони пойтахт баргузор шуданд.

Дар анҷоми чорабинии фарҳангӣ-фароғатӣ ба ифтихори фарорасии соли нави мелодии 2020 дар фазои пойтахт  мушакпарронии (фейрверки) идона сурат гирифт.

Декабрь 31, 2019 21:36

Хабарҳои дигари ин бахш

Дар Душанбе даври ҷумҳуриявии озмуни «Сайри гули лола» баргузор мегардад
Имрӯз дар «Кохи Суруш»- и шаҳри Душанбе Рӯзи пойтахти Ҷумҳурии Тоҷикистон таҷлил карда шуд
ДУШАНБЕ-ШАҲРИ КӮДАКОНИ ХУШБАХТ! Дар пойтахт сохтмони 56 муассисаи таҳсилоти томактабӣ идома дорад
ДУШАНБЕ-ШАҲРИ РАВАНДСОЗ. Ин равандҳо фарогири доираи васеи кишварҳо аз чор қитъаи олам- Осиё, Аврупо, Африқо ва Амрико мебошад
ТУ ШАҲРИ ГУЛБАДОМОНӢ, ДУШАНБЕ ! Ба Рӯзи пойтахти Ҷумҳурии Тоҷикистон бахшида мешавад
ПОЙТАХТ — СИМОИ МИЛЛАТУ ДАВЛАТ! Иқтибосҳо аз суханрониҳои Президенти Тоҷикистон ба муносибати Рӯзи пойтахт
Шаҳриёри шаҳри умеду орзуҳо ва идомадиҳандаи роҳи ниёгони некном
ДУШАНБЕИ ДИГАР. Бинои нави Парлумони Тоҷикистон дар пойтахти кишвар шаҳомоти хоса дорад
ДУШАНБЕ –МУАРРИФИ ТАЪРИХУ ФАРҲАНГ. Сокини пойтахт будан дар баробари ифтихор аз ҳар шахс масъулияти зиёд талаб мекунад
Бахшида ба Рӯзи пойтахти Тоҷикистон барномаҳои фарҳангӣ ва мусобиқаҳои варзишӣ доир мегарданд
Нақши пойтахт дар таҳкими давлатдории навини миллӣ муҳим арзёбӣ мегардад
Душанбе оинаи миллат ва пайвандгари таърих бо ояндаи давлат аст