«Табобат» бо тилловорӣ. Дар Душанбе «табиби халқӣ»-и мардумфиреб дастгир шуд

Декабрь 9, 2019 10:11

ДУШАНБЕ, 09.12.19. /АМИТ «Ховар»/. Кормандони Раёсати Вазорати корҳои дохилӣ дар шаҳри Душанбе дар натиҷаи пешбурди корҳои фаврӣ-ҷустуҷӯӣ як нафар занро бо ҷурми мардумфиребӣ  дастгир намуданд. Дастгиршуда Ҷураева Наҷмия Додарбековнаи 37-сола, зодаи ноҳияи Ҷалолиддини Румии вилояти Хатлон буда, айни ҳол  истиқоматкунандаи шаҳри Гулистони вилояти Суғд мебошад. Номбурда ба пойтахт омада,  худро  табиби халқӣ эълон карда, бо усули нав, яъне бо тилло гӯё ба дарди шаҳрвандон дармон мебахшидааст.

Тавре аз маркази матбуоти Раёсати мазкур ба АМИТ «Ховар» хабар доданд, зимни омӯзишу мавриди санҷиш қарор додани муроҷиатҳои шаҳрвандон ва пешбурди корҳои тафтишотӣ муайян  шуд, ки номбурда худро ба шаҳрвандон табиби халқӣ муаррифӣ намуда, гӯё  ба воситаи тилло бахткушо, сеҳру ҷоду, инчунин як қатор бемориҳои дигарро «табобат» мекардааст.

Масалан, ин «табиби халқӣ»  бо мақсади он ки гӯё муносибатҳои як нафар зани 31-солаи сокини пойтахтро бо шавҳараш хуб мекунад, ба боварии ӯ даромада, як миқдор ҷавоҳироти арзишманди тиллоии ӯро  дуохонӣ намуда, бо рӯймол дар миёнаш бастааст. Пас аз чанд лаҳза, гӯё  бо мақсади маротибаи дуюм дуохонӣ намудан миёнбандашро  кушода, ҷавоҳироти тиллоиро гирифта, дар ҷайбаш пинҳон кардааст. Бо ин роҳ ба ҷабрдида зиёда аз 105 ҳазор сомонӣ зарар расонидааст.

Ҳамин тариқ, номбурда дар айни замон барои содир намудани 9 ҳолати ҷинояти қаллобӣ гумонбар дониста шуда, бо ин роҳ ба шаҳрвандон 66 ҳазор доллари амрикоӣ ва 215 ҳазору 550 сомонӣ зарари моддӣ ба миқдори махсусан калон расонидааст.

Айни замон нисбат ба гумонбаршаванда Ҷураева Наҷмия Додарбековна тибқи талаботи моддаи 247-и (Қаллобӣ) Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, номбурда дар ҳабси пешакӣ қарор дорад.

Кормандони милисаи пойтахт аз он  изҳори нигаронӣ намуданд, ки пайваста аз фиребу макр ва амалҳои мардумфиребонаи нафарони сеҳргару ҷодугар ва ба ном «табибони халқӣ»  гузоришҳо нашр мегарданду баъзе   сокинон аз он сабақи зарурӣ намегиранд. Мутаассифона, боз ҳам дар ҷомеа нафароне ёфт мешаванд, ки роҳҳои «нав» кашф намуда,  ба чунин амалҳои номатлуб  даст мезананд ва бо мақсади ба даст овардани даромади муфт  шаҳрвандони зудбоварро ба доми худ меафтонанд.

Декабрь 9, 2019 10:11

Хабарҳои дигари ин бахш

Раёсати Шурои ҳамоҳангсозии мақомоти зиддимухаддиротии СААД дар соли 2027 ба Тоҷикистон гузашт
Байни Тоҷикистон ва Амороти Муттаҳидаи Арабӣ Ёддошти тафоҳум оид ба эътирофи мутақобили шаҳодатномаҳои ронандагӣ ба имзо расид
Дар Прокуратураи генералӣ Рӯзи Президентро таҷлил намуданд
Нақшаи даъвати тирамоҳии шаҳрвандони Тоҷикистон ба сафи Артиши миллӣ пурра иҷро шуд
80 корманди мақомоти корҳои дохилӣ бо манзили зист таъмин мешаванд
Соли 2027 Тоҷикистон раёсатро дар Созмони Аҳдномаи амнияти дастҷамъӣ ба уҳда мегирад
Ҳабибулло Воҳидзода бо сафири навтаъйини Беларус дар Тоҷикистон мулоқот намуд
Эмомалӣ Раҳмон: «Ҳар корманди милитсия бояд бо рафтору гуфтор, дониш, самимияту эътимод сазовори боварии шаҳрвандон бошад»
Дар Роғун Рӯзи милитсияи тоҷикро таҷлил намуданд
Дар Суғд Рӯзи милитсияи тоҷикро ботантана таҷлил намуданд
Дар 26 шаҳру ноҳияи Тоҷикистон шуъбаҳои Вазорати корҳои дохилӣ бо биноҳои замонавӣ таъмин шуданд
Рӯзи милитсияи тоҷик дар Вилояти Мухтори Кӯҳистони Бадахшон ботантана таҷлил гардид