Дар Вазорати рушди иқтисод ва савдо масъалаи мубориза ба муқобили хатару таҳдидҳои ҷаҳонӣ баррасӣ гардид

ДУШАНБЕ, 11.12.2019. /АМИТ «Ховар»/. «Мубориза ба муқобили хатару таҳдидҳои ҷаҳонӣ — терроризм ва ифротгароӣ»-таҳти чунин унвон дар Вазорати рушди иқтисод ва савдои Ҷумҳурии Тоҷикистон ҷамъомад доир гардид. 

Дар ҷамъомад муовини Вазири рушди иқтисод ва савдо Тоҷиддин Ҷӯразода ва намояндаи Прокуратураи генералии Ҷумҳурии Тоҷикистон Ҳомидҷон Маҷидов ширкат варзида, дар мавзӯи мубориза ба муқобили хатару таҳдидҳои ҷаҳонӣ, аз ҷумла терроризм ва ифротгароӣ сухан карданд.

Зикр гардид, ки тавре Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамеша таъкид менамоянд: «Экстремизм ва терроризм аз ҷумлаи хатарҳои торафт вусъатёбандаи ҷаҳони муосир буда, мубориза бар зидди онҳо ҳамеша дар сархати вазифаҳои муҳимтарини мақомоти ҳифзи ҳуқуқ ва сохторҳои низомӣ қарор дорад».

Зимни ҳамоиш инчунин оид ба сабабҳои шомилшавии шаҳрвандони ноогоҳи мамлакат ба созмону ҳаракатҳои террористиву экстремистӣ ва пешгирӣ намудани пайравии ҷавонон аз чунин созмонҳо мубодилаи афкор сурат гирифт.  Аз иштирокчиён, хусусан ҷавонон даъват ба амал оварда шуд, ки дар ин роҳ зиракии сиёсиро аз даст надода, бо рафтору кирдори худ намунаи ибрат бошанд.