Бахшида ба 100-солагии агентии «Анадолу» логотип таҳия гардид

ДУШАНБЕ, 02.01.2020 /АМИТ «Ховар»/. Агентии иттилоотии Туркия «Анадолу» логотиперо, ки ба 100-солагии  таъсисёбии он бахшида шудааст, муаррифӣ намуд. Тавре АМИТ «Ховар» бо истинод ба агентии “Азертаҷ” хабар медиҳад, логотипи ҷашниро ситора ва ҳилол  аз рӯи парчами Туркия бо нишони эҳтиром ба солҳои аввали фаъолияти агентӣ оро  медиҳанд.

Агентии  «Анадолу»  6 апрели соли 1920 бо ташаббуси асосгузори ҷумҳурии Туркия  Мустафо Камол Отатурк бо мақсади огоҳ  сохтани ҷомеаи ҷаҳонӣ аз рӯйдодҳои воқеӣ дар Анатолия таъсис ёфта буд. Агентӣ ин рисолати муҳимро муваффақона адо  намуда, ҳамзамон   иҷро карда истодааст,  гуфта мешавад дар хабар. Айни замон агентӣ дар саросари Туркия 14 шуъбаи минтақавӣ ва 30 идора дорад. Дар хориҷи кишвар агентӣ дорои 20 бунгоҳи матбуотӣ мебошад.

Раиси шӯрои директорон ва директори  генералии агентӣ Шенол Казанҷи хотирнишон сохт, ки рисолати фаъолияти солҳои аввали «Анадолу» мубориза бо иттилооти дурӯғангез ва ба роҳ мондани маҷрои ахбор дар шароити мураккаби муборизаи миллӣ –озодихоҳӣ буд.

То замони садсолагии таъсиси худ агентии «Анадолу» фаъолияташро ба сифати агентии бузурги иттилоотӣ идома медиҳад, зикр намуд  Казанҷи.

«Дар зарфи 100 соли фаъолият агентӣ аз бисёр ҷиҳат тағйир ёфт. Логотипи нави агентӣ-ин тағйирот ва суръати фаъолияти онро инъикос менамояд. Махсус ба ифтихори садсолагии агентӣ мо қарор додем, ки ба логотипи агентӣ рамзи ҳилол ва ситораро  ҳамчун ёдоварӣ аз таърихи пайдоиш ва комёбиҳои агентӣ зам намоем», — таъкид намуд ӯ.

Ба гуфти ӯ,  “АА”  дар соли ҷашнӣ ният дорад, ки  маҷмӯи лоиҳаҳоро амалӣ созад.

Маълумот дар бораи ин лоиҳаҳо дар сомонаи  100yil.aa.com.tr, ки  дар арафаи ҷашни садсолагӣ омода мегардад, ҷой дода мешавад.

Хотирнишон месозем, ки байни Агентии Миллии Иттилоотии Тоҷикистон «Ховар» ва Агентии  Иттилоотии Ҷумҳурии Туркия  «Anadolu Ajansi»  лоиҳаи Созишнома дар бораи ҳамкории тарафайн, ки бо қарори Ҳукумати Ҷумҳурии Тоҷикистон дастгирӣ ёфтааст, барои имзо омода гардидааст.