БИСЁРЕ АЗ СОКИНОНИ ДУШАНБЕРО БЕМОРИИ СИРОЯТӢ АЗ ПОЙ АФТОНД. Аз рӯйи аломатҳо ин беморӣ ба зуком монанд аст, лекин дар бисёр ҳолатҳо ҳарорат баланд нагардида, бинӣ сероб намешавад

Январь 12, 2020 08:20

ДУШАНБЕ, 12.01.2020 /АМИТ «Ховар»/. Дар Душанбе бисёре аз сокинони хурду бузургро бемории сироятӣ аз пой афтонд. Тавре «Азия Плюс» менависад, «аз рӯйи аломатҳо ин беморӣ ба зуком (грипп) монанд аст, лекин дар бисёр ҳолатҳо ҳарорати одам баланд нашуда, бинӣ ҳам сероб намешавад».

Сардухтури беморхонаи сироятии пойтахт Мунира Каримова дар бораи дар кадом ҳолат ба табиб дарҳол муроҷиат намудан ва дар сурати табобат накардани беморӣ чӣ мешавад ба «Азия Плюс» нақл кард.

«Ҳозир мавсими сирояти шадиди вируси роҳҳои нафас, аз ҷумла, зуком аст. Табиист, ки ин гуна бемориҳо аз серобшавии бинӣ, сулфа, заифӣ ва дардҳои тамоми ҷисм оғоз мешаванд. Ин аломатҳои возеҳи бемории вирусӣ мебошад. Дар мо ин «мавсими беморӣ» моҳи сентябр оғоз шуда, то моҳи апрел идома меёбад», — мегӯяд ӯ.

Ба гуфтаи сардухтур, сирояте, ки имрӯзҳо дар шаҳр «сайругашт дорад», зукоми оддист. «Чунин ҳолатҳое мешавад, ки шахс ҳарорати баланд надораду бинӣ ҳам сероб нест. Хоболудӣ аломати олудашавии бадан мебошад. Ҳамаи ин мавсимист», — итминон медиҳад Мунира Каримова.

Баъзе беморон бо ҳарорати баланди бадан қай мекунанд, ки барои зуком ғайримаъмулист.

«Бархе аз волидон иштибоҳан чунин мешуморанд, ки ҳароратро бе ҳароратсанҷ (термометр) бо даст метавон муайян кард. Аз аломатҳо онҳо танҳо хунукии нӯги дастону пойҳоро қайд мекунанд. Гап сари он аст, ки сардии нӯгҳои дасту пой бо ҳарорати баланд аввалин аломати рагкашӣ аст. Аз ин рӯ, ҳароратро танҳо бо ҳароратсанҷ муайян кардан лозим аст, чунки дар муқоиса бо санҷидани даст он хеле баландтар буда метавонад», — шарҳ дод сардухтур.

Бино ба гуфтаи ӯ, роҳи асосии пешгирии беморӣ машғул шудан ба варзиш, сайругашт дар ҳавои тоза ва истеъмоли меваи тару тоза мебошад.

Агар касе аз аҳли оила аллакай ба беморӣ гирифтор шуда бошад, риояи гигиенаи шахсӣ (пӯшидани ниқобҳои тиббӣ, истифодаи дастпокчаҳо (салфеткаҳо)-и якдафъаина ва ғайра) ҳатмӣ буда, ҳамчунин нӯшидани оби бисёр ва истеъмоли меваҳои дорои витамини С тавсия дода мешавад.

Донистан муҳим аст: дар сурати пайдо шудани аломатҳои аввалини беморӣ ба табиби дармонгоҳи наздиктарини хона муроҷиат кардан зарур аст. Агар шабона ҳарорат баланд шавад, ба беморхонаи сироятӣ муроҷиат кардан мебояд, ки шабонарӯзӣ кор мекунад. Агар кӯдак бемор шавад, ба Беморхонаи кӯдаконаи сироятии шаҳр муроҷиат кунед.

Ҳамчунин Мунира Каримова зикр менамояд, ки дар вақти хунукӣ вируси шадиди роҳҳои нафас хеле мустаҳкам буда, дар масофаи 1 метр ба шахси дигар гузашта метавонад.

Табиб ҳамчунин таъкид менамояд, ки дар сурати таваҷҷуҳ накардан ба вируси шадиди роҳҳои нафас, шахс метавонад ба бемории шохаҳои роҳи нафаскашӣ (бронхит), илтиҳоби пардаҳои майна (менингит), норасоии нафаскашӣ ва варами гӯш ва кӯдакон ба касалии шохаҳои роҳи нафаскашӣ ва варами шуш (пневмония) гирифтор шаванд.

Акс аз бойгонӣ

Январь 12, 2020 08:20

Хабарҳои дигари ин бахш

Кормандони Кумита оид ба таҳсилоти ибтидоӣ ва миёнаи касбӣ суханронии Сарвари давлатро ба муносибати Рӯзи дониш якҷоя тамошо намуданд
Ба намояндагони касбу кори гуногуни вилояти Хатлон мукофотҳои давлатӣ тақдим карда шуд
«Барномаи рушди соҳаҳои таҳсилоти ибтидоӣ ва миёнаи касбии Ҷумҳурии Тоҷикистон барои солҳои 2026-2030» қабул гардид
Татбиқи лоиҳаҳои сармоягузорӣ дар соҳаи таҳсилоти ибтидоӣ ва миёнаи касбӣ бо намояндаи Бонки Осиёии рушд баррасӣ гардид
Дар Душанбе оид ба татбиқи иммунизатсия бар зидди вируси папилломаи одам машварати омӯзишӣ оғоз шуд
Татбиқи лоиҳаи «Беҳтарсозии малакаҳои касбӣ ва имконияти бокортаъминшавӣ» баррасӣ гардид
НЕЪМАТЕ ХУШТАР ЗИ ИСТИҚЛОЛ НЕСТ! Муҳимтарин омили таҳкими истиқлоли Тоҷикистон густариши худшиносию худогоҳии миллӣ аст
Сиёсати иҷтимоии Пешвои миллат такягоҳи суботи иҷтимоӣ ва рушди устувори давлат мебошад
Беш аз 15 ҳазор оилаҳои дар минтақаи зериобшавандаи НБО «Роғун» қарордошта бо манзили доимии зист ва қитъаи замини наздиҳавлигӣ таъмин гардиданд
Тоҷикони муқими шаҳри Толяти аз пешрафту дастовардҳои Тоҷикистон ифтихор менамоянд
Дар Тоҷикистон Рӯзҳои иммунизатсияи иловагӣ бар зидди бемориҳои сурхча ва гулафшон оғоз гардид
Мутахассисон баланд шудани ҳолати ифлосшавии ҳавои атмосфериро дар Тоҷикистон пешгӯӣ менамоянд