Дастовардҳои олимони тоҷик дар соли 2019 беҳтарин натиҷа дар даврони Истиқлолияти давлатӣ арзёбӣ гардиданд

Январь 15, 2020 10:25

ДУШАНБЕ, 15.01.2020 /АМИТ «Ховар»/. Дар соли 2019 аз тарафи олимони Академияи илмҳо 27 патенти Ҷумҳурии Тоҷикистон ва 1 патенти АвруОсиё барои ихтироот, 7 қарори мусбат оид ба додани патенти Ҷумҳурии Тоҷикистон барои ихтироот, 5 шаҳодатномаи муаллифӣ ва 5 шаҳодатнома оид ба сабти давлатии захираи  иттилоотӣ ба даст оварда шуд, ки ин нишондиҳанда нисбат ба соли 2018-ум 12 адад зиёд мебошад. Дастовардҳои олимони тоҷикро дар соли 2019 метавон беҳтарин натиҷа дар даврони Истиқлолияти давлатӣ арзёбӣ намуд. Ин матлабро президенти Академияи илмҳои Ҷумҳурии Тоҷикистон, академик Фарҳод Раҳимӣ дар ҷаласаи ҷамъбастии натиҷаҳои фаъолияти ин муассисаи илмӣ иброз намуд.

Бино ба маълумоти номбурда инчунин дар соли 2019 барои истифодаи амалӣ дар истеҳсолот беш аз 35  коркард ва таклифу тавсияҳои олимони Академияи илмҳои Ҷумҳурии Тоҷикистон ба вазорату идораҳои дахлдор пешниҳод гардидааст.

Дар ҷаласа натиҷаҳои асосии фаъолияти илмӣ ва илмию ташкилии АИ ҶТ дар соли 2019 ва вазифаҳо барои соли 2020 мавриди таҳлил қарор гирифт. Президенти Академияи илмҳои ҶТ, академик Фарҳод Раҳимӣ паҳлуҳои асосии фаъолияти муассисаҳои илмиро баррасӣ намуда, зикр кард, ки тавре Пешвои миллат муҳтарам Эмомалӣ Раҳмон дар Паёми навбатӣ таъкид намуданд, олимонро зарур аст, ки дар баробари рушди илми тоҷик дар самти фаҳмондадиҳии моҳияти равандҳои муосир, мубориза бо хурофоту иртиҷоъпарастӣ ва тақлид ба расму ойинҳои бегона миёни ҷомеа корҳои тарғиботиро тақвият бахшида, рисолати сиёсиву иҷтимоӣ ва фарҳангии худро дар назди халқу Ватан содиқона иҷро намоянд. Инчунин назорати азхудкунии донишҳои замонавиро пурзӯр гардонида, наврасону ҷавононро ба мутолиаи китобҳои бадеиву илмӣ ташвиқ намоянд.

Баъди таҳлили натиҷаҳои фаъолияти Академияи илмҳо ба олимоне, ки дар соли 2019 соҳиби ҷоизаҳои АИ ҶТ ба номи олимони барҷаста гардидаанд, дипломҳо супорида шуданд. Аз  ҷумла ба доктори илмҳои техникӣ, мудири озмоишгоҳи физикаи атмосфераи Институти физикаву техникаи ба номи С.У.Умарови АИ ҶТ Сабур Абдуллоев, номзади илмҳои физикаю математика, ходими пешбари илмии Институти физикаву техникаи ба номи С.У.Умарови АИ ҶТ Владимир Маслов, номзади илмҳои физикаю математика, ходими пешбари илмии Институти физикаву техникаи ба номи С.У.Умарови АИ ҶТ Баҳром Назаров Ҷоизаи ба номи академик С.У.Умаров дар соҳаи илмҳои физикаву математика, химия, геология ва техника, ба узви вобастаи АИ ҶТ, доктори илмҳои биологӣ, мудири озмоишгоҳи фотосинтез ва маҳсулнокии растаниҳои Институти ботаника, физиология ва генетикаи растании АИ ҶТ Ҳомидҷон Абдуллоев Ҷоизаи ба номи академик Е.Н.Павловский дар соҳаи илмҳои биология, тиб ва кишоварзӣ, ба доктори илми таърих, мудири шуъбаи Аврупо ва Амрикои Институти омўзиши масъалаҳои давлатҳои Осиё ва Аврупои АИ ҶТ Санавбар Воҳидова,   ба доктори илми филология, мудири шуъбаи илмию ташкилии Раёсати АИ ҶТ Пирмаҳмад Нуров Ҷоизаи ба номи академик М.С.Осимӣ дар соҳаи илмҳои ҷамъиятшиносӣ ва гуманитарӣ супорида шуд.

Январь 15, 2020 10:25

Хабарҳои дигари ин бахш

Рӯзҳои синамои Узбекистон дар Тоҷикистон бо намоиши филми ҳунарии «Зинда бод, ҳамсар!» ҷамъбаст гардид
«САД РАНГИ ЧАКАН». Дар Душанбе ин фестивали ҷумҳуриявӣ ҷамъбаст гардид
Роҳбарзанони Узбекистон бо табиати зебои шаҳри Норак шинос шуданд
Дар Душанбе ҳамкории илмии Академияи миллии илмҳои Тоҷикистон ва Донишгоҳи Акитаи Ҷопон баррасӣ шуд
Дар Донишгоҳи техникии Тоҷикистон даври аввали Озмуни ҷумҳуриявии «Илм-фурӯғи маърифат» баргузор шуд
Донишкадаи давлатии фарҳанг ва санъати Тоҷикистон бо 4 муассисаи таҳсилоти олии Узбекистон ҳамкорӣ мекунад
«ШОҲРОҲИ БУЗУРГИ АБРЕШИМ». Тоҷикистон барои иштирок дар ин намоиши байналмилалӣ омодагии ҷиддӣ мебинад
Дар Душанбе конференсияи ҷумҳуриявӣ оид ба ҳифзи ёдгориҳои таърихию фарҳангӣ доир гардид
Дар Душанбе бо иштироки олимону зиёиёни Тоҷикистон ва Узбекистон конференсияи байналмилалӣ баргузор шуд
Дар доираи Ҳафтаи илм оид ба мероси уран дар Осиёи Марказӣ конфронси байналмилалӣ баргузор гардид
ИМРӮЗ-РӮЗИ ҶАҲОНИИ ҲИФЗИ ЁДГОРИҲОИ ТАЪРИХИЮ ФАРҲАНГӢ. Дар Тоҷикистон зиёда аз 100 ёдгории таърихиву фарҳангӣ тармиму барқарор гардид
Дар Қасри фарҳанги ноҳияи Варзоб ба алоқамандони синамо филми ҳунарии «Таҳаввулот» намоиш дода шуд