Директори яке аз муассисаҳои пешқадами таълимии пойтахт ба вакилии Маҷлиси намояндагони Маҷлиси Олии Ҷумҳурии Тоҷикистон номзад пешбарӣ шуд

ДУШАНБЕ, 08.01.2020 /АМИТ «Ховар»/. Дар Конференсияи якҷояи ташкилотҳои Ҳизби Халқии Демократии Тоҷикистон дар ноҳияҳои Исмоили Сомонӣ ва Синои шаҳри Душанбе номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатаи №2-и ноҳияи Исмоили Сомонӣ пешбарӣ шуд.

Дар кори конфренсия муовини Раиси ҲХДТ Асрор Латифзода,  Раиси Кумитаи иҷроияи ҲХДТ дар шаҳри Душанбе Зоир Раҳмонзода, Раиси Кумитаи иҷроияи ҲХДТ дар ноҳияи Исмоили Сомонӣ Насимҷон Расулзода, Раиси комиссияи ҳавзавии интихоботии №2 Комилҷон Шарипов ва  вакилони Конференсия иштирок намуданд.

Мутобиқи рўзномаи кори конференсия масъалаи пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатаи №2-и ноҳияи Исмоили Сомонӣ мавриди баррасӣ қарор гирифт.

Дар Конференсия  роҳбари яке аз муассисаҳои пешқадами  таълимии пойтахт — директори мактаби таҳсилоти миёнаи умумии №8 шаҳри Душанбе Парвина Меликова аз ҳавзаи интихоботии якмандатаи №2-и ноҳияи Исмоили Сомонӣ номзад ба вакилии Маҷлиси намояндагони Маҷлиси Олии Ҷумҳурии Тоҷикистон пешбарӣ шуд.

Ҳамзамон роҷеъ ба Барномаи ҲХДТ, нақшу саҳми ҳизби бонуфузи мамлакат дар пойдории сулҳу суботи сиёсӣ, рушду пешрафти мамлакат ва ҳадафи Барномаи навбатии ҲХДТ барои солҳои 2020-2025, ки ба нафъи Тоҷикистони маҳбуб ва некуаҳволии мардуми мамлакат нигаронида шудааст, ибрози андеша карда шуд.

ДАР АКС: Парвина Меликова дар байн. Аз рост – Шоири халқии Тоҷикистон, дорандаи Ҷоизаи давлатии ба номи Рӯдакӣ, муаллифи матни Суруди миллии Тоҷикистон Гулназар Келдӣ.