Дар ноҳияи Ҷаббор Расулов беш аз 10 ҳазор дарахт мешинонанд

ДУШАНБЕ. 01.02.2020. /АМИТ «Ховар»/. Дар  маъракаи умумиҷумҳуриявии ниҳолшинонӣ, ки дар ноҳия ҳамасола аз охирҳои моҳи январ оғоз гардида, то моҳи апрел идома меёбад, шинонидани  беш  аз 10 ҳазор дарахтони гуногуни сояафкан, мевадиҳанда ва ороишӣ ба нақша гирифта шудааст.

Ин матлабро иҷрокунандаи вазифаи раиси ноҳияи Ҷаббор Расулов Тоҳир Қудратзода зимни нишасти матбуотии ин мақомот баён намуд.

Дар нишасти мазкур  гуфта шуд, ки  соли 2019  корхонаҳои саноатии  ноҳияи Ҷаббор Расулов  ба маблағи 231 млн. 462,7 ҳазор сомонӣ маҳсулот истеҳсол намуданд, ки ин нишондод нисбат ба соли 2018  32 млн. сомонӣ зиёд аст.  Ифтитоҳи коргоҳи «Органик Ян», ки  ба истеҳсолии коркарди нахи пахта ва ресандагӣ машғул аст,  130 нафар занонро  ба кор  фаро гирифта, барои ба ноҳияи саноатию аграрӣ табдил ёфтани он замина гузошт. Ҳамзамон барои татбиқи 6 лоиҳаи давлатӣ дар ин давра баҳри рушди соҳаҳои мухталифи ноҳия 20 млн 900 ҳазор сармоя ҷалб карда шудааст

Тоҳир Қудратзода дар бораи корҳои омодагӣ  ба таҷлили ҷашни  30- солагии Истиқлолияти давлати Ҷумҳурии Тоҷикистон  иттилоъ  дода, аз ҷумла гуфт, ки  аз  427 банди  нақша- чорабиниҳои ноҳия бахшида ба ин ҷашни таърихӣ   256 банди он  иҷро гардид.

«Айни замон  141 иншоот мавриди баҳрабардорӣ қарор гирифта,  дар ин замина 414 ҷойҳои нави корӣ ташкил гардиданд, ки аз  ин теъдод  256 нафарро  занон  ташкил медиҳанд»,-афзуд номбурда

Ҳамзамон вобаста ба омодагиҳо ба  чорабинии муҳимми оммавию сиёсӣ-интихоботи вакилони халқ  иттилоъ дода  шуд, ки имрӯз дар ноҳия 40 ҳавза ва 43 участкаи интихоботӣ ташкил  гардида,  1 март наздики  110 ҳазор нафар сокинони ноҳия дар овоздиҳӣ  иштирок  менамоянд.

Баъди анҷоми  нишасти хабарӣ  иҷрокунандаи раиси ноҳия бо иштироки бевоситаи  20 нафар рӯзноманигорон дар майдони «Нишон»-и    ноҳия  беш аз 15 бех ниҳоли арча шинонидаанд.