Дар Япония изҳор доштанд, ки коронавируси нав аз зукоми одӣ хавфноктар нест

ДУШАНБЕ, 06.02.2020 /АМИТ «Ховар»/. Коронавируси 2019-nCoV, ки сабаби илтиҳоби шуш мегардад,  бо дараҷаи хатарнокӣ  шабеҳи зукоми одӣ буда, то ҳол дар Япония боиси ягон бемории вазнин  нагаштааст. Дар ин бора раиси Ассотсиатсияи Япония оид ба омӯзиши бемориҳои  сироятӣ,  профессор Кадзухиро Татэда ҳангоми мусоҳиба бо рӯзномаи Nikkei баён дошт, хабар медиҳад АМИТ «Ховар» бо истинод ба ТАСС.

«Институти миллии бемориҳои сироятӣ бемории коронавирусро  таҳқиқ намуд. Дақиқ гардид, ки  ин ҷо ягон тағйирёбии табиӣ ё сунъии генетикӣ вуҷуд надорад, то иқтидори сироятӣ ва  иллатнокиро афзоиш диҳад. Коронавируси нав ягон хусусияти мушаххаси  хатар надорад, он ба зукоми муқаррарӣ монанд аст»,-  бо эътимод гуфт ӯ.

Профессор аз фавти зиёди  беморон  дар Чин бинобар хурӯҷи намуди нави илтиҳоби шуш изҳори тааҷҷуб намуд. «Дар Япония ягон бемор бо  ҳолати вазнин вуҷуд надорад»,- зикр  намуд ӯ.  — Эҳтимол  ин аз фарқияти  усулҳои  табобат  вобаста бошад».

То ҳол дар Япония 23 ҳолати  сирояти 2019-nCoV расман тасдиқ шудааст.