ИНТИХОБОТ — 2020: нозирони ИДМ аз якчанд участкаҳои интихоботии Тоҷикистон дидан намуданд

 ДУШАНБЕ, 13.02.2020 /АМИТ «Ховар»/. Ҳайати нозирон аз Иттиҳоди Давлатҳои Мустақил мушоҳидаро аз рӯи интихоботи Маҷлиси намояндагони Маҷлиси Олии Ҷумҳурии Тоҷикистон давом дода истодаанд. Дар ин бора мухбири АМИТ «Ховар» бо истинод ба ситоди ҳайати мушоҳидони ИДМ хабар медиҳад.

Муовини Раиси Кумитаи иҷроияи ИДМ Агибай Смагулов ва нозирон аз ҳайати  ИДМ бо раванди омодагиҳо дар  комиссияи интихоботии минтақаҳои Ваҳдат ва Файзобод шинос шуданд.

Роҳбари комиссияи интихоботӣ дар бораи корҳои анҷомёфта оид ба омодагиҳо ба интихоботи дарпешистода иттилоъ дода, омӯзиши аъзои комиссияи интихоботӣ ва раванди корҳои таблиғотиро муфассал шарҳ дод. Зикр гардид, ки ба номзадон ба вакилӣ барои пешбурди корҳои таблиқотӣ ҳамаи имкониятҳои қонунӣ фароҳам оварда шудаанд.

Ба нозирон иттилоъ дода шуд, ки то ҳол дар хусуси поймолкунии конунгузории интихоботӣ ба комиссия ягон ариза ё шикоят ворид нагардидааст.

Бо ташриф овардан ба участкаҳои интихоботӣ аъзои ҳайат ба хулосае омаданд, ки ҳамаи ҷойҳои муқарраргардида бо санадҳои қонунгузорӣ, тавсияномаҳои методии зарурӣ, дастурамалҳо, маводи иттилоотӣ ва таҷҳизоти зарурӣ муҷаҳҳаз мебошанд.

Ҳайати мушоҳидон аз ИДМ назоратро аз рӯи раванди омодагӣ ва баргузории интихоботи парлумонӣ дар Тоҷикистон идома дода, дар оянда оид ба натиҷаи он маълумоти иловагӣ пешниҳод мекунад.