Пагоҳ дар Осорхонаи миллӣ намоиши аксҳо таҳти унвони «Артиши миллӣ – сипари боэътимоди Ватан» оғоз мегардад

ДУШАНБЕ, 14.02. 2020 /АМИТ «Ховар»/. Аз  15  то  24 феврал бахшида ба 27-солагии Артиши миллӣ дар Осорхонаи миллии Тоҷикистон  таҳти унвони «Артиши миллӣ – сипари боэътимоди Ватан» намоиши акс ва дигар маводи марбут ба таърихи таъсиси Қувваҳои мусаллаҳи Ҷумҳурии Тоҷикистон баргузор мешавад. Пагоҳ, 15 феврал намоиши мазкур, ки  бо ибтикори роҳбарияти Осорхонаи миллии Тоҷикистон дар ҳамкорӣ бо Вазорати мудофиаи Ҷумҳурии Тоҷикистон ташкил  шудааст, оғоз мегардад. Бо ибтикори роҳбарияти Осорхонаи миллӣ ба таври ройгон 1000 нафар афсарону сарбозон аз Осорхона ва намоиши мазкур дидан  менамоянд.

 Тавре корманди Осорхонаи миллии Тоҷикистон Фирдавси Абдулҳамид ба хабарнигори АМИТ «Ховар»  изҳор дошт,  мақсад аз ташкили намоши мазкур  инъикоси муфассали фаъолияти заҳматталаб ва бошарафу содиқонаи муҳофизони Тоҷикистон буда,  ба ин восита дар рӯҳияи ватандӯстӣ тарбия намудани насли наврас ва ҷавонон  мебошад.

Дар намоиш 88 акс, тамринҳои ҳарбии ҷузъу томҳои низомии мамлакат тавассути оинаи нилгун ва маводи марбут ба таърихи Артиш   ба тамошобинон  манзур мешаванд.

Инчунин  онҳо имкон доранд, ки  дар ин намоиш  аксҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, Сарфармондеҳи олии Қувваҳои Мусаллаҳ, генерали артиш Эмомалӣ Раҳмон ҳамчун бунёдгузори Артиши миллӣ бо афсарону сарбозон ҳангоми боздид  аз ҷузъу томҳои низомӣ ва иштирок дар машқгоҳҳои ҳарбиро тамошо кунанд.

Ҳамчунин дар намоиш маҷаллаҳои «Муҳофизони Ватан», рӯзномаи «Ҳомии Ватан», «Паёми Донишкадаи ҳарбӣ», китобҳои ҷашнии Вазорати мудофиа, ки инъикосгари ҳаёти низомиёни мамлакат мебошанд, пешниҳоди тамошобинон мегарданд.