Зулфия Давлатзода: Дар 95 муассисаи таълимӣ мутахассисони соҳаи фарҳанг омода карда мешаванд

ДУШАНБЕ, 06.02.2020. /АМИТ «Ховар»/. Дар Вазорати фарҳанги Ҷумҳурии Тоҷикистон 95 муассисаи таълимии соҳаи фарҳанг амал мекунанд, ки дар онҳо мутахассисони баландихтисос омода карда мешаванд. Ин нуктаро имрӯз Вазири фарҳанги Ҷумҳурии Тоҷикистон Зулфия Давлатзода зимни  нишасти матбуотии ин ниҳод ба хабнигорон иброз намуд.

Зимни нишаст гуфта шуд, ки дар назди Вазорати фарҳанги Ҷумҳурии Тоҷикистон як муассисаи таълимӣ, 3 мактаби олӣ- Донишкадаи давлатии фарҳанг ва санъати Тоҷикистон ба номи М. Турсунзода, Консерваторияи миллии Тоҷикистон ба номи Т. Сатторов, Донишкадаи давлатии санъати тасвирӣ ва дизайни Тоҷикистон, 6 коллеҷи соҳавӣ, 2 мактаб-интернати махусгардонидашудаи соҳаи мусиқӣ ва санъат фаъолият менамоянд.

Ба гуфти Зулфия Давлатзода, 3 мактаби олии касбиро 695 нафар ва 6 коллеҷи соҳавиро 635 нафар бо ихтисосҳои  гуногун хатм карданд.

«Бо мақсади тайёр кардани мутахассисони соҳаи фарҳанг ва санъат дар хориҷи мамлакат тибқи квотаҳои ҷудонамудаи Вазорати маориф ва илми  Федератсии Россия барои таҳсил ба муассисаҳои таҳсилоти олии касбии ин кишвар тавассути Маркази илм ва фарҳанги Федератсияи Россия дар Тоҷикистон —  «Россотрудничество» 48 нафар аз имтиҳонҳои қабул гузашта, айни ҳол дар муассисаҳои таълимии Россия таҳсил намуда истодаанд»,- иброз намуд мавсуф.

Ҳамчунин таъкид гардид, ки Вазорати фарҳанг соли 2020 барои дар сатҳи баланд пешвоз гирифтани ҷашнҳои дар пеш истода сафи ҷавонони лаёқатмандро бештар менамояд.

Соли 2019 дар миқёси ҷумҳурӣ зиёда аз 10 700 барномаи гуногун доир гардиданд, ки ҳадафи онҳо ғанӣ гардонидани фазои фарҳангии мамлакат, рушди устувори деҳот ва ҳунарҳои бадеии халқӣ, ҷалби сайёҳон ба мавзеъҳои таърихию фарҳангӣ ва ба ин восита тарғиби анъанаҳои неки ниёгон, арҷгузорӣ ба таъриху фарҳанги волои халқи тоҷик мебошад.