Бинобар сабаби авҷи коронавирус мусобиқаи Гран Прии Работ дар Марокаш доир намешавад

ДУШАНБЕ, 04.03.2020. /АМИТ «Ховар»/. Федератсияи байналмилалии дзюдо бо изҳори таассуф иттилоъ додааст, ки бинобар сабаби авҷи вируси корона дар ҷаҳон мусобиқаи Гран Прии Работ дар Марокаш доир намешавад. Дар ин бора намояндаи расмии Кумитаи миллии олимпии Тоҷикистон Умаралӣ Сафаралӣ ба мухбири АМИТ «Ховар» хабар дод.

Баргузории мусобиқаи мазкур 6-8 март ба нақша гирифта шуда буд. Ҳукумати Ҷумҳурии Марокаш дар бораи барҳам додани ҳамаи чорабиниҳои байналмилалии варзишӣ, намоишҳо ва чорабиниҳои ҷамъиятӣ қарор қабул кардааст.

«Мо аз ҳамаи шахсони манфиатдор, аз ҷумла варзишгарон ва ҳайатҳои расмии давлатҳо барои пеш омадани ҳолати ногаҳонӣ узр мепурсем», — омадааст дар сомонаи расмии Федаратсияи байналмилалии дзюдо.

Хотиррасон мешавем, ки дар Марокаш 1 ҳолати гирифторӣ ба вируси COVID-19 ба қайд гирифта шудааст.

Барои иштирок дар Гран Прии Работ, аз ҷумла дастаи мунтахаби дзюдои Тоҷикистон дар ҳайати 7 нафар номнавис шуда буд.