ҶДММ «Спитамен Текстайл» сармоя, таҷриба ва технологияи Кореяи Ҷанубиро ба Тоҷикистон меорад

Март 17, 2020 10:20

ДУШАНБЕ, 17.03.2020. /АМИТ «Ховар»/. ҶДММ «Спитамен Текстайл»-и Ҷумҳурии Тоҷикистон бо ширкати “Baoshan Tianfang Science and Technology LTD”-и  Кореяи Ҷанубӣ Созишномаи ҳамкории сармоягузорӣ имзо кард, ки он ба ҷониби Тоҷикистон имкон медиҳад истеҳсолоти худро як баробар афзоиш диҳад. Намояндагони ду ширкати нассоҷӣ бо ҳамдигар дар Намоишгоҳи байналмилалии ришта дар Истанбул моҳи феврали соли гузашта вохӯрда, доир ба ҳамкорӣ ба мувофиқа расида буданд. Дар ин бора аз ҶДММ «Спитамен Текстайл» ба АМИТ «Ховар» хабар доданд.

Ширкати кореягӣ узви “Tianjin Tianfang Investment Holding Co Ltd”- истеҳсолкунанда ва паҳнкунандаи маъруфи маҳсулоти нассоҷӣ дар кишвараш мебошад.

Ба иттилои муассис ва директори кулли ҶДММ “Спитамен Текстайл” Акбар Ҳакимов, бо шарофати ҳамкорӣ бо ширкати кореягӣ онҳо соҳиби таҷҳизоти замонавии коркарди нахи пахта ва истеҳсоли ришта мешаванд.

Директори фабрикаи нассоҷии ҶДММ “Спитамен Текстайл” Мирзоқодир Бақоев иброз намуд, ки тавоноии истеҳсолии онҳо аз 7560 дуки ресандагӣ ҳоло то ба 14000 дук расида, содирот низ як баробар афзоиш меёбад. Ҳамкорӣ бо ширкати кореягӣ ҳамчунин дар харидории нахи пахта ва дарёфти муштарӣ барои риштаи истеҳсолшуда ёрӣ хоҳад расонид.

Ҳаҷми умумии сармояи пешбинишуда ба “Спитамен Текстайл” имкон медиҳад, то шумораи кормандонро аз 184 нафари ҳозира то 300 нафар зиёд кунад, тавоноии истеҳсолии корхонаро як баробар афзоиш диҳад ва таҷҳизоти зарурии ресмонресиро бо ҳадафи афзоиши навъи маҳсулоти омода бихарад. Феълан, мутахассисони Кореяи Ҷанубӣ дар ноҳияи Спитамен қарор дошта, корҳои омодагиро оғоз кардаанд.

Ҷиҳати татбиқи ҳадафи коркарди пурраи пахта дар дохили ҷумҳурӣ ҶДММ «Спитамен Текстайл» истеҳсоли маҳсулоти дӯзандагиро низ рӯзҳои наздик роҳандозӣ мекунад. Дар ноҳияи Файзобод бинои корхонаи дӯзандагии ин ҷамъият аллакай омода буда, қисман муҷаҳҳаз гардонида шудааст. Дар назар аст, ки бо пурра муҷаҳҳаз гардидани корхона ва ба истеҳсолот оғоз кардани он бонувони маҳаллӣ бо ҷои кор таъмин гарданд.

ҶДММ «Спитамен Текстайл» соли 2009 таъсис ёфта, яке аз бузургтарин корхонаҳои нассоҷии Тоҷикистон бо соҳибмулкии пурраи маҳаллӣ мебошад. Ширкат бо таҷҳизоти замонавии итолиёвӣ муҷаҳҳаз буда, маҳсулоташ ба ҳамаи меъёрҳои ҷаҳонӣ мувофиқ мебошад. Маҳсулоти худро ширкат асосан ба Чин, Туркия ва Кореяи Ҷанубӣ содирот менамояд.

Март 17, 2020 10:20

Хабарҳои дигари ин бахш

Истгоҳи обуҳавосанҷии Горбунов дар пиряхи «Тоҷикистон» навсозӣ карда мешавад
ҚАТЪНОМАИ ТАЪРИХӢ БАРОИ ОСИЁИ МАРКАЗӢ. Чӣ гуна ташаббуси Президенти Тоҷикистон зеҳни сунъиро ба рӯзномаи Маҷмаи Умумии СММ ворид кард
Ба бунёди боғҳои интенсивӣ ва суперинтенсивӣ таваҷҷуҳро бештар намоем. Шарҳи коршинос
Ҳаҷми маблағгузории Фонди иқлими сабз барои Тоҷикистон ба 235 миллион доллар расидааст
Ҷаласаи навбатии Гурӯҳи кории байниидоравӣ оид ба мониторинг ва арзёбии ҳуҷҷатҳои банақшагирии стратегӣ доир шуд
«БАРНОМАИ ДАВЛАТИИ РУШДИ МАЪРИФАТ ВА ФАРҲАНГИ ЭКОЛОГӢ». Он ба баланд бардоштани фарҳанги экологии аҳолӣ равона шудааст
Тоҷикистон дар COP31 таъсиси платформаи минтақавии инноватсияҳои «сабз»-ро дар Осиёи Марказӣ пешниҳод намуд
Директори Агентии авиатсияи гражданӣ Ҳабибулло Назарзода дар Ассамблеяи 43-юми ИКАО дар шаҳри Монреали Канада иштирок намуд
Ҳамкории Тоҷикистон бо Фонди ОПЕК дар самти ҳифзи муҳити зист густариш меёбад
Дар Кӯлоб таҳти роҳбарии муовини Сарвазири Тоҷикистон Усмоналӣ Усмонзода ҷаласаи гурӯҳи корӣ доир шуд
Тоҷикистон ва ИМА таъсиси Шурои муштараки кориро баррасӣ намуданд
Дар Павилиони миллии Тоҷикистон дар COP31 чорабинии минтақавӣ баргузор гардид