Ишкошим: ба пешвози Наврӯзи Аҷам корҳои ободонию сабзазоркунӣ вусъат меёбанд

ДУШАНБЕ, 17.03.2020. /АМИТ «Ховар»/. Кормандони  Шуъбаи Вазорати корҳои дохилӣ дар ноҳияи Ишкошими Вилояти Мухтори Кӯҳистони Бадахшон ба корҳои сабзазоркунии атрофи шуъба ва тоза намудани муҳити атроф   шурӯъ карданд. Дар ин бора аз Мақомоти иҷроияи ҳокимияти давлатии ноҳияи Ишкошим ба АМИТ «Ховар» иттилоъ доданд.

Ин амали хешро масъулин ба фаро расидани фасли баҳор ва Наврӯзи байналмилалӣ вобаста дониста, изҳор намуданд, ки аз қадим аҷдодони мо ба пешвози Наврӯзи Аҷам хонаву дар, кӯчаю маҳаллаҳо ва тамоми ҷойҳоро тозаву озода намуда, ҷашнро бо шодию нишот ва рӯҳияи баланди ватанпарастию инсондӯстӣ пешвоз мегирифтанд.

Аз соли 2019 инҷониб бинои асосии шуъба вобаста ба талаботи сохтмонӣ таъмир гардида, қисми зиёди корҳо қариб ба анҷом расонида шудаанд.

Айни замон  корҳои сафолакпӯш намудани роҳравҳои назди шуъба идома доранд.