Муроҷиати Вазорати корҳои хориҷии Ҷумҳурии Тоҷикистон ба шаҳрвандони ҷумҳурӣ дар робита ба ҷорӣ гардидани маҳдудияти вуруд ба Қирғизистон

ДУШАНБЕ, 19.03.2020 /АМИТ «Ховар»/. Вазорати корҳои хориҷии Ҷумҳурии Тоҷикистон иттилоъ медиҳад, ки бо сабаби паҳншавии бемории сироятии  коронавируси нав (COVID-19) дар Қирғизистон аз 19 марти соли 2020 маҳдудияти ворид шудан ба хоки он кишвар ҷорӣ гардид.

Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Вазорати корҳои хориҷии Тоҷикистон дар ин робита тавсия медиҳад, ки шаҳрвандони мамлакат дар айни замон аз сафар ба Ҷумҳурии Қирғизистон худдорӣ намоянд.

Бояд таъкид кард, ки маҳдудияти мазкур нисбат ба ронандагони автомобилҳои боркаш ва сарнишинони ҳавопаймоҳо татбиқ намегардад.Хуруҷи шаҳрвандони давлатҳои хориҷӣ ва шахсони бешаҳрвандӣ аз қаламрави Ҷумҳурии Қирғизистон мувофиқи қонунгузории он кишвар сурат мегирад.

Хотиррасон мекунем, ки шаҳрвандони Тоҷикистон, ки дар Қирғизистон қарор доранд, дар ҳолати зарурат метавонанд ба намояндагии дипломатии мо муроҷиат кунанд:

Сафорати Ҷумҳурии Тоҷикистон дар Ҷумҳурии Қирғизистон

Суроға: ш.Бишкек 720031 к. Кара-Даринская х.36

Тел: (+996 312) 51 16 37; 51 23 43

Е-mail: tjemb.kg@mfa.tj