Оқибати офати табиӣ дар роҳи мошингарди Лаби Ҷар – Сангвор –Дарвоз бартараф гардид

ДУШАНБЕ, 26.03.2020. /АМИТ «Ховар»/. 25 марти соли равон, соати 17:40 дар километри 22-юми  роҳи мошингарди Лаби Ҷар — Сангвор-Дарвоз аз сабаби боришоти пуршиддат сел ба вуҷуд омада,  ҳаракати воситаҳои нақлиётро дар  роҳи мазкур  ба мушкилӣ  рӯ ба рӯ кард. Дар ин бора аз Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба АМИТ «Ховар» хабар доданд.

Тавре аз Муассисаи давлатии нигаҳдории роҳҳои автомобилӣ (МДНРА)-и ноҳияи Сангвор иттилоъ доданд,  корҳои    бартарафсозии оқибати офати табиӣ  ва таъмини ҳаракати мунтазами  воситаҳои нақлиёт дар роҳи мазкур  идома дошта, то соати 22:00  он пурра аз сангу рег тоза  ва  ҳаракати мошинҳо аз ду тараф ба роҳ монда шудааст.

Аз ҷониби МДНРА-и ноҳияи Сангвор дар минтақаи зикргардида, ки хавфи дубора омадани сел вуҷуд дорад, навбатдории шабонарузӣ ташкил гардида,  як гурӯҳ нигоҳдорони роҳ   ва  як адад нақлиёти муҳандисӣ  дар ҳолати омодагӣ  қарор дорад. Айни замон  ҳаракати мунтазами  воситаҳои нақлиёт дар роҳи мазкур  таъмин гардидааст.