Омодагӣ ба ҷашни Наврӯз. Дар ноҳияи Файзобод 756 бех дарахти сояафкан ва 700 бех дарахти мевадиҳанда шинониданд

ДУШАНБЕ, 12.03.2020 /АМИТ  «Ховар»/. Кишоварзони ҷамоати деҳоти ба номи Дӯстмурод Алиеви ноҳияи Файзобод ба корҳои баҳорӣ ва ниҳолшинонӣ омодагии хуб гирифта, то ин муддат 756 бех дарахти сояафкан ва 700 бех дарахти мевадиҳанда шинониданд.

Ҳоло корҳои омодагӣ ба баҳору шинонидани дарахтони мевадиҳанда дар хоҷагиҳои деҳқонии Сайдонӣ, Кабкрез ва Кӯҳсори ноҳия хуб ҷараён доранд. Дар ин хоҷагиҳо дар баробари бунёди боғҳои нав ба коркарду ғизодиҳии боғзори мавҷуда диққати зарурӣ дода мешавад.

Ғаллакорони ҷамоат то имрӯз дар 43 гектар кишти баҳорӣ гузаронида, саъй доранд, ки то охири мавсим майдони ғалладонагиро ба 310 гектар расонанд. Картошкапарварони ҷамоат мақсад доранд, ки имсол дар 60 гектар картошка ва дар 112 гектар сабзавот кишт намоянд.

Раиси ҷамоати деҳоти ба номи Дӯстмурод Алиев Холмаҳмад Гулзода гуфт, ки барои дар сатҳи баланд пешвоз гирифтани ҷашни Наврӯзи байналмилалӣ дар хоҷагиҳои деҳқонӣ ва ҳамаи деҳаҳои ҳудуди ҷамоат корҳои ободонӣ, тоза кардани ҷӯйҳо, ба тартиб даровардани хонаҳо, сафед кардани деворҳо идома доранд. Мардум ба ҳашари умумӣ баромада, дар қатори дигар корҳои ободонӣ дар шоҳроҳ дарахтони сояафкану гулу буттаҳо мешинонанд.

Инчунин дар ҳудуди деҳоти Меҳробод дарахтони 200 гектар боғ аз шоху навдаҳои зиёдатӣ сабукбор гардонда шуда, коркарди боғҳо ҳоло ба охир нарасидааст. Сокинони деҳаҳои Яккабед ва Гулафшон бо тавсияи мутахасисон дар талу теппаҳо 4 гектар боғ бунёд намудаанд. Деҳқонони ҷамоати Меҳробод азм доранд дар 42 гектар картошка шинонанд.