«Сомон Эйр»: Мусофирон барои баргардонидани чипта ва ё ивази он ба муҳлати дертар бояд ба нуқтаи хариди он муроҷиат намоянд

ДУШАНБЕ, 20.03.2020 /АМИТ «Ховар»/. Шурӯъ аз 20 март ширкати ҳавопаймоии «Сомон Эйр» парвозҳоро дар тамоми  хатсайрҳои байналмилалӣ муваққатан қатъ намуд. «Сомон Эйр» тасмим гирифтааст, ки имрӯз,  20 март хатсайри махсуси Душанбе-Москва-Душанбе-ро иҷро намуда, аз Душанбе ба Москва шаҳрвандони Федератсияи Россия ва аз Москва ба Душанбе шаҳрвандони Тоҷикистонро интиқол диҳад.

Аз ширкати ҳавопаймоии «Сомон Эйр» ба АМИТ «Ховар» иттилоъ доданд, ки ин тасмим дар асоси  дастури Агентии авиатсияи граждании назди Ҳукумати Ҷумҳурии Тоҷикистон бо мақсади пешгирии эҳтимолияти паҳншавии бемории коронавирус ва таъмини амнияти шаҳрвандони Ҷумҳурии Тоҷикистон гирифта шудааст.

Сарчашма иттилоъ медиҳад, ки барои баргардонидани чипта ва ё ивази он ба муҳлати дертар мусофирон бояд ба нуқтаи хариди чиптаашон муроҷиат намоянд. Маълумоти бештар бо телефонҳои 44-640-40-49, 44-640-40-50 ва почтаи электронии call-center@somonair.com. дастрас мегардад.