Бонки ҷаҳонӣ барои пешбурди корҳои барқарорсозии ёдгориҳои фарҳангии вилояти Хатлон 4,5 миллион доллар пешбинӣ намудааст

Апрель 9, 2020 14:05

ДУШАНБЕ, 09.04.2020 /АМИТ «Ховар»/. Бонки ҷаҳонӣ барои пешбурди корҳои барқарорсозӣ ва беҳбуд бахшидан ба иншооти Хоҷа Машҳади ноҳияи Шаҳритус, қалъаи Ҳулбуки ноҳияи Восеъ, «Чилучорчашма»-и ноҳияи Носири Хусрав  ва таҳияи коркарди нақшаҳои тиҷоратӣ 4,5 миллион доллар сармоягузорӣ пешбинӣ намудааст. Инчунин дар доираи лоиҳа грантҳои хурд барои рушди тиҷорати хусусӣ дар самтҳои такмили сифати хизматрасонии меҳмонхонаҳо, ширкатҳои туристӣ, тарабхонаҳо, коркарди маҳсулоти кишоварзӣ ва монанди ин ҷудо карда мешаванд. Ин нуктаро 8 апрел Роҳбари гурӯҳи лоиҳаи «Рушди иқтисодиёти деҳот»-и Бонки ҷаҳонӣ Андреа Далл Олио зимни суҳбати мустақими интернетӣ бо раиси вилояти Хатлон Қурбон Ҳакимзода, раиси Кумитаи рушди сайёҳии назди Ҳукумати Ҷумҳурии Тоҷикистон Ширин Амонзода, муовини роҳбари лоиҳа Талайбек Кошматов аз шаҳри Бишкеки Қирғизистон  (дар алоқа), мутахассисон Татяна Сегал ва Юн Фан аз Вашингтон (дар алоқа) ва мушовирони дафтари Бонки ҷаҳонӣ дар Тоҷикистон Алишер Исоев, Наврӯза Алиқулова аз Душанбе (дар алоқа)  баён намуд. Дар ин бора хабарнигори АМИТ «Ховар» бо истинод ба маркази матбуотии раиси вилояти Хатлон иттилоъ медиҳад.

Ҳамчунин лоиҳа ба ҷудо намудани грантҳои хурд барои дастгирии корхонаҳои хурди коркарди маҳсулоти кишоварзӣ, аз ҷумла сабзавот, шир ва ба талаботи ҷаҳонӣ мувофиқ гардонидани мавзеъҳои «Чилучорчашма», Хоҷа Машҳад ва қалъаи Ҳулбук ҳамчун объектҳои сайёҳӣ мусоидат менамояд.

Раиси вилояти Хатлон Қурбон Ҳакимзода зикр намуд, ки дар сурати татбиқ гардидани лоиҳаи «Рушди иқтисодиёти деҳот» Бонки ҷаҳонӣ дар таъмини ҳадафи чоруми стратегӣ – саноатисозии  босуръати мамлакат ва Солҳои рушди деҳот, сайёҳӣ ва ҳунарҳои мардумӣ, ки аз ҷониби Сарвари давлат пешниҳод шудаанд, саҳми намоён мегузорад.

«Мо омодаем, ки бо Бонки ҷаҳонӣ ва лоиҳаҳои бо маблағҳои ин бонк амалишаванда ҳамкории доимӣ ва манфиатбахш дошта бошем. Амалишавии «Рушди иқтисодиёти деҳот»-и Бонки ҷаҳонӣ ба пешрафти иқтисодиёту иҷтимоиёти вилоят ва баланд шудани сатҳи зиндагии мардум мусоидат менамояд»,-иброз намуд Қурбон Ҳакимзода.

Ҳамчунин ҷонибҳо вазъи кунунӣ дар кишварҳои ҷаҳон бар асари ҳамагирии вируси нави корона, чораҳои пешгирии паҳншавии бемории мазкур дар ҷумҳурӣ, инчунин вусъат додани ҳамкории мақомоти иҷроияи ҳокимияти давлатии вилояти Хатлон ва Бонки ҷаҳониро мавриди баррасӣ қарор доданд.

Апрель 9, 2020 14:05

Хабарҳои дигари ин бахш

САДРИДДИН АЙНӢ ВА ИНҚИЛОБИ МАДАНӢ
Коллексияи либосҳои донишҷӯёни тоҷик дар Озмуни умумирусиягии «Нафаси баҳор» сазовори ҷойи якум гардид
Дар Душанбе таҳти унвони «Пиряхҳои Тоҷикистон: зебоӣ ва ҳифзи онҳо» ҳамоиш доир гардид
Таҳти унвони «Тоҷикистон — зодгоҳи орзуҳои ҷавонӣ» барномаи фарҳангӣ-фароғатӣ доир мешавад
Ҷавонони Осиёи Марказӣ ва кишварҳои арабии Халиҷ бо тамаддуни тоҷикон шинос шуданд
Дар Санкт-Петербург коллексияи либосҳои донишҷӯёни Донишкадаи давлатии санъати тасвирӣ ва дизайни Тоҷикистон намоиш дода шуд
Ноҳияи Данғара мизбони Рӯзҳои фарҳанги Ҷумҳурии Озарбойҷон шуд
Нахустин нишасти Муколамаи Тирмиз оид ба робитаҳои мутақобили Осиёи Марказӣ ва Ҷанубӣ баргузор гардид
Дар Академияи миллии илмҳои Тоҷикистон Рӯзи ҷавонон таҷлил гардид
Байни Китобхонаи миллии Тоҷикистон ва Китобхонаи миллии Озарбойҷон Созишнома ба имзо расид
Бахшида ба Конфронси байналмилалии сатҳи баланд оид ба ҳифзи пиряхҳо байни кӯдакону наврасон озмуни расмкашӣ доир гардид
Комрон Бобоев аз Тоҷикистон соҳиби ҷоизаи «Беҳтарин олими ҷавон-2025»-и озмуни байналмилалӣ гардид