«Бонуи Пик» -дар саҳнаи Театри давлатии академии опера ва балет

ДУШАНБЕ, 16.04.2020 /АМИТ «Ховар»/. 19 апрел, соати 18:00, Театри давлатии академии опера ва балети ба номи Садриддин Айнӣ спектакли навро бо номи «Бонуи Пик» манзури ҳаводорони санъати театрӣ мегардонад.

Тавре аз Театри  мазкур  ба АМИТ «Ховар» хабар доданд, намоиши мазкур ба ҷашни 180-солагии композитори рус Пётр Чайковский бахшида шудааст. «Бонуи Пик» дар заминаи сиёсати фарҳангии давлату Ҳукумати Ҷумҳурии Тоҷикистон бо мақсади баргардонидани шуҳрати ҷаҳонии санъати опера ва балети тоҷик таҳия шуда, ба талабот ва завқи бинандаи имрӯз созгор аст.

Коргардон-таҳиягари намоиш Суҳроб Усмонов, рассом Ҷамшед Юнусов, дирижёр Анвар Шоймуродов ва хормейстер Елена Тиллоева мебошанд.

Дар намоиш нақшҳоро  ҳунармандони касбӣ Манучеҳр Раҳмонов, Сайфулло Юсупов, Достон Холов, Содиқ Нуруллоев, Нарзулло Болтуев, Қурбон Зокиров, Комрон Содиқов, Амонуллои Нурулло, Пайрав Аюбов, Ҷамшед Саидов, Шуҳрат Сафаров, Сафар Салихов, Такуи Арутюнян, Ангелика Тиман, Шарофат Усмонзода, Манижа Назарова, Макнуна Хайруллозода, Мария Мирзоева ва Мунзифа Исоева иҷро мекунанд.

Операи «Бонуи Пик» дар асоси романи машҳури Александр Пушкин тавассути композитори машҳур Пётр Чайковский эҷод шудааст. Чайковский «Бонуи Пик»-ро хеле дӯст медошт ва онро шоҳкор меномид. Опера аввали баҳори соли 1890 дар Флорентсия навишта шуда, оҳиста-оҳиста ба репертуари бисёр театрҳои Аврупо ва Амрико ворид гардидааст. Онро то имрӯз дар театрҳои калони шаҳрҳои Москва, Прага, Вена, Ню-Йорк, Лондон ва ғайраҳо бо забонҳои гуногун ба саҳна гузоштаанд.