ЭҲТИЁТ! Коронавирус метавонад дар ҳудуди чор метр ба каси дигар гузарад

ДУШАНБЕ, 15.04.2020 /АМИТ «Ховар»/. Коронавируси нав метавонад дар ҳудуди чор метр аз як нафар ба нафари  дигар гузарад. Тавре ТАСС хабар медиҳад, рӯзи сешанба мудири кафедраи эпидемиология ва тибби собиткунандаи Донишгоҳи  якуми тиббии Москва ба номи  И. М. Сеченов, табиби мустақили Вазорати тандурустӣ Николай Брико   чунин изҳор дошт.

«Мутахассисони  CDC (Марказҳо оид ба  назорат ва пешгирии бемориҳо дар ИМА) барои Созмони Умумиҷаҳонии Тандурустӣ тадқиқот гузаронда, муайян намуданд, ки вирус то масофаи чор метр имкони ба каси дигар гузаштан дорад»,- гуфт ӯ дар мусоҳиба бо шабаки телевизионии «Россия-24».

Брико  ёдрас намуд, ки  бо вуҷуди эҳтимолияти паҳншавии  вирус то чаҳор метр  риоя намудани масофаи ду метри иҷтимоӣ  метавонад дар ин маврид  чораи муассир бошад. «Ман фикр мекунам, ки эҳтимоли интиқоли вирус маҳз ба ҳамин ду метри номбаркарда  рост меояд ва риояи он натиҷаи пурсамар ба бор меорад»,- афзуд ӯ.

АКС аз Валерий Шарифулин/ТАСС