Оқибатҳои тармаи роҳи «Душанбе-Варзоб» бартараф ва ҳаракати мошинҳо дубора таъмин шуд

ДУШАНБЕ, 13.04.2020. /АМИТ «Ховар»/. Субҳи 13 апрел аз сабаби боридани барфи шадид дар километри 60-уми роҳи мошингарди «Душанбе-Варзоб» тарма фаромада, роҳ ва маҷрои дарёро баст. Дар як муддати кӯтоҳ оқибатҳои  тарма бартараф ва ҳаракати мошинҳо дубора таъмин карда шуд. Дар ин бора АМИТ «Ховар» бо истинод ба Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар медиҳад.

Барои бартараф намудани оқибатҳои тармафароии мазкур кормандони ширкати  «Инновейтив Роуд Солюшнз» ва наҷотдиҳандагони Кумитаи ҳолтаҳои фавқулода ва мудофиаи граждании назди Ҳукумати Ҷумҳурии Тоҷикистон бо ҷудо намудани техникаи зарурӣ сафарбар гардиданд.

Барои таъмини бехатарӣ дар километри 62-юми роҳи «Душанбе – Айнӣ» наҷотдиҳандагони Кумитаи ҳолатҳои фавқулода ва мудофиаи гражданӣ ба таври шабонарӯзӣ навбатдорӣ мекунанд.

Кумита ба сокинони мамлакат ҳушдор додааст, ки то охири ҳафта боридани борон пешгӯӣ гардида, дар роҳҳои кӯҳӣ хатари лағзиши тарма, резиши санг ва боло рафтани сатҳи оби дарёҳо аз эҳтимол дур нест.

Аз ин рӯ,  Кумитаи ҳолатҳои фавқулода ва мудофиаи гражданӣ аз сокинон  хоҳиш менамояд, ки  ҷӯйборҳову каналҳои назди биноҳои истиқоматии худро аз ҳар гуна хасу партов ва лойқа тоза кунанд, то оби боронҳои шадид бе мамониат ба ҷуйборҳо ҷорӣ шуда, ба хонаву ҳавлӣ ва заминҳои кишт  зарар нарасонад.

Кумита ҳамчунин ба шаҳрвандони  мамлакат тавсия медиҳад, ки дар рӯзҳои боронӣ аз баромадан ба шикор, моҳидорӣ, корҳои саҳроӣ, ҷамъоварии гиёҳҳои шифобахш ва чорводорӣ худдорӣ намоянд. Барои пешгирии садамаҳо дар шоҳроҳҳо, алахусус ҳангоми истифодаи роҳҳои кӯҳӣ ва ағбаҳо ронандагон бояд тамоми қоидаҳои ҳаракатро дар роҳро риоя намуда, хусусан суръати ҳаракатро баланд насозанд.

Дар ҳолати рух додани ҳодисаҳои нохуш шаҳрвандон метавонанд ба рақами ягона- 112 ё қисми навбатдории Кумитаи ҳолатҳои фавқулода ва мудофиаи гражданӣ  бо рақами 93 880 28 19 ва 223 13 11, инчунин  Раёсати КҲФ дар ш.Душанбе:

225-44-73, 225-44-76, 225-44-90

Раёсати КҲФ дар вилояти Хатлон:

(83222) 2-35-05, 2-78-28

Раёсати КҲФ дар ВМКБ:

(83522) 2-40-57, 2-53-47

Раёсати КҲФ дар вилояти Суғд:

(83422) 6-58-72, 5-15-5

 дар тамос шаванд.