«Сарчашмаи саодат» — аксияи намоиш ва фурӯши китобҳои тозанашр дар Суғд

ДУШАНБЕ, 17.04.2020 /АМИТ «Ховар»/. Бо иқдоми Кумитаи иҷроияи Ҳизби Халқии Демократии Тоҷикистон дар вилояти Суғд бахшида ба Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф   аксияи намоиш ва фурӯши китобҳои тозанашр таҳти унвони «Сарчашмаи саодат» баргузор шуд. Дар ин бора ба АМИТ  «Ховар» аз Маркази иттилоот ва таҳлили КИ ҲХДТ дар шаҳри Хуҷанд хабар доданд.

Дар аксия дар баробари дигар кумитаҳои иҷроияҳои шаҳру ноҳияҳои вилоят кумитаи иҷроияи шаҳрӣ ва 150 ташкилотҳои ибтидоии ҳизбии шаҳри Хуҷанд ширкати фаъолона дошта, ба маблағи 33 ҳазору 712 сомонӣ 1 ҳазору 265  китоб хариданд. Махсусан кумитаҳои иҷроияи ибтидоии ба номи Бобоҷон Ғафуров, «Сомон», «Осимӣ», «Инқилоб», ташкилотҳои ибтидоии «Амонатбонк»,  Маркази Тоҷикстандарт дар вилояти Суғд, беморхонаи вилоятии Суғд, «Ҷавонӣ», Маркази саратоншиносӣ  дар аксия фаъолнокӣ зоҳир намуданд.

Дар расми ифтитоҳи ҳамоиш дар баробари иштироки Раиси кумитаи иҷроияи ҲХДТ дар вилояти Суғд Матлубахон Сатториён, муовини Раиси вилоят Зайнура Азимӣ, шоирони халқии Тоҷикистон Аскар Ҳаким, Аҳмадҷони Раҳматзод, инчунин муовини раиси шаҳри Хуҷанд Фирӯза Нуруллозода ширкат варзид. Барои иштироки фаъолона ба мақомоти иҷроияи ҳокимияти давлатии шаҳри Хуҷанд Сипоснома ва ҳамчун нишони қадршиносӣ китобҳои тозанашр аз ҷониби кумиҷроияи вилоятӣ тақдим гардиданд.