Вазири маориф ва илм Муҳаммадюсуф Имомзода ва Сафири Япония дар Тоҷикистон Такаюкӣ Мияшита вохӯрӣ намуданд

ДУШАНБЕ, 15.04.2020 /АМИТ «Ховар»/. Айни ҳол дар 3 муассисаи таҳсилоти олии касбии Ҷумҳурии Тоҷикистон – Донишкадаи давлатии забонҳои Тоҷикистон ба номи С. Улуғзода, Донишкадаи омӯзгории Тоҷикистон дар шаҳри Панҷакент ва Донишгоҳи славянии Россия ва Тоҷикистон омӯзиши забони японӣ ба роҳ монда шудааст.

Дар ин бора имрӯз зимни вохӯрии Вазири маориф ва илми Ҷумҳурии Тоҷикистон  Муҳаммадюсуф Имомзода бо Сафири Япония дар Тоҷикистон Такаюкӣ Мияшита иттилоъ дода шуд.

Тавре  сардори маркази матбуоти Вазорати маориф ва илм Эҳсон Сафарзода ба АМИТ «Ховар» хабар дод, дар вохӯрӣ ҷонибҳо доир ба  ҳамкории ҷойдошта дар соҳаи маориф ва илм   ва густариши он дар оянда табодули  назар  карданд. Аз ҷумла, зикр намуданд, ки ҳамкорӣ миёни Ҷумҳурии Тоҷикистон ва  Япония  дар самти маориф ва илм дар асоси Созишномаи байниҳукуматӣ ва Протоколи ҷаласаи Комиссияҳои байниҳукуматии Тоҷикистон – Япония  оид ба ҳамкории иқтисодӣ, техникӣ ва илмӣ ба роҳ монда шудааст.

Инчунин зимни вохӯрӣ иттилоъ дода шуд, ки ҳамасола дар ҷумҳурӣ озмуни наттоқи забони японӣ баргузор  мегардад. Донандагони забони японӣ ҷиҳати таҳсил ва такмили забономӯзӣ ба Япония  сафарбар гардида, омӯзгорони соҳибзабон ва соҳибкасби японӣ ҷиҳати тадриси ин  забон ба донишҷӯён дар муассисаҳои болозикр аз Япония  ҷалб карда мешаванд.

Ёдовар мешавем, ки соли 2019 бо ташаббуси Сафорати Япония  дар Душанбе ва маблағгузории ин кишвар дар Тоҷикистон се муассисаи таҳсилоти умумӣ дар шаҳрҳои Роғун, Турсунзода ва ноҳияи Файзобод бо маблағи 3,6 млн сомонӣ ба истифода дода шуданд.

Ҷонибҳо дар фарҷоми  суҳбат ҳавасмандии худро вобаста ба  густариши бештар додани ҳамкорӣ дар самти маориф ва илм иброз намуда, пешниҳодҳои мушаххас ва судманд манзур намуданд.