Хатлон: 101 тонна олу ба хориҷи мамлакат содирот гардид

ДУШАНБЕ, 28.05.2020. /АМИТ Ховар/.  27 май аз вилояти Хатлон ба Федератсияи Россия боз 50 тонна олу содирот карда шуд. Соҳибкорони маҳаллӣ олуро аз ноҳияи Кӯшониён дар қуттиҳои махсус бор карда, тавассути мошинҳои борбар ба шаҳри Санкт-Петербург равон намуданд. Дар ин бора аз шуъбаи иттилоотию таҳлилии дастгоҳи Раиси вилояти Хатлон ба АМИТ «Ховар» хабар доданд.

Як рӯз пеш боғпарварони ноҳияи Ҷалолиддини Балхӣ низ бо мусоидати бахши намояндагии Агентии содироти назди Ҳукумати Ҷумҳурии Тоҷикистон дар вилояти Хатлон ба хориҷи мамлакат 51 тонна меваҷот содир карда буданд.

То имрӯз асосан аз навоҳии Ҷ. Балхӣ, Кӯшониён ва Ҷайҳуни  вилояти Хатлон ба хориҷи мамлакат ҷамъан 139 тонна мева бо иловаи лимӯ содирот шудааст. Мавсими содироти меваҷот, тавре ки мутахассисон таъкид мекунанд, нав  шурӯъ шудааст.

Имсол тибқи дурнамо, аз шаҳру навоҳии вилояти Хатлон ба давлатҳои хориҷи дуру наздик 90 ҳазор тонна меваю сабзавот содирот мешавад.

То 27 май ин нақша ба андозаи 40,5% иҷро гардида, ба хориҷа 36 ҳазору 429,1 тонна меваю сабзавот, аз ҷумла 36 ҳазору 255,2 тонна пиёз содир карда шудааст, ки дар муқоиса ба ҳамин давраи соли 2019 ба андозаи қариб 15 ҳазор тонна маҳсулот бештар аст.

Маҳсулоти кишоварзии истеҳсоли вилояти Хатлон асосан ба Қазоқистон, Покистон, Афғонистон, Федератсияи Россия ва Қирғизистон равона гардидаанд.