АМАЛИЁТИ «НАВРАС». Дар кӯчаҳои пойтахт 93 ҳолати бе ниқобҳои тиббии муҳофизатӣ гаштугузор намудани ноболиғон ошкор гардид

Июнь 10, 2020 13:22

 ДУШАНБЕ, 10.06.2020. /АМИТ «ХОВАР»/. 9 июни соли равон зимни гузаронидани амалиёти шартии «Наврас», ки аз ҷониби кормандони Хадамоти пешгирии ҳуқуқвайронкунӣ байни ноболиғон ва ҷавонони милитсияи пойтахт гузаронида шуд, 93 ҳолати бе ниқобҳои тиббии муҳофизатӣ гаштугузор намудани ноболиғон ошкор гардида, барои оворагардӣ 8 нафари онҳо ба Қабулгоҳ-таҳвилгоҳи ноболиғон дастрас карда шуданд.  Дар ин бора аз Вазорати корҳои дохилии Ҷумҳурии Тоҷикистон ба АМИТ «Ховар» хабар доданд.

Тибқи тавсия ва хулосаи мутахассисони соҳаи тиб аз як ҷиҳат агар истифодаи ниқобҳои муҳофизатии тиббӣ ва риояи масофаи иҷтимоӣ эҳтимоли гирифторшавӣ ба бемориҳои сироятиро кам намояд аз ҷониби дигар дар хона нишастан ва бе зарурат ба берун наборомадан василаи асосии муҳофизати худ аз ин бемории ҳамагир мебошад. Махсусан нафарони солхурда ва ноболиғон бояд бе зарурат ба берун набароянд ва ҳангоми баромадан ба таври қатъӣ аз воситаҳои муҳофизатӣ истифода намоянд.

Дар акси ҳол гаштугузор намудан бе истифода аз ниқобҳои тиббии муҳофизатӣ, махсусан дар ҷойҳои ҷамъиятӣ ва серодам василаи асосӣ барои гирифтор шудан ба ҳар гуна бемориҳои сироятӣ, аз ҷумла коронавируси нави COVID-19 мегардад. Аз ин лиҳоз ҷиҳати пешгирӣ аз паҳншавии ин намуд беморӣ, аз ҷониби Ситоди ҷумҳуриявӣ оид ба пешгирӣ ва мубориза бар зидди коронавирус гаштугузори шаҳрвандон дар кӯчаву хиёбон ва дигар ҷойҳои ҷамъиятӣ бо ниқобҳои муҳофизатӣ ҳатмӣ гардидааст.

Вобаста ба ин ва ҷиҳати риояи ҳатмии талаботҳои Ситоди ҷумҳуриявӣ оид ба риояи қоидаҳои беҳдоштӣ ва санитарию эпидимиологӣ ва пеш аз ҳама огоҳонидани шаҳрвандон аз хатари паҳншавии бемории мазкур аз ҷониби кормандони Раёсати ВКД дар шаҳри Душанбе гурӯҳҳои корӣ ташкил карда шуда, дар кӯчаву хиёбонҳои шаҳри Душанбе ва дӯкону фурӯшгоҳ, мағозаҳои фурӯши хӯроки умум ва дигар маконҳои гаштугузори шаҳрвандон суҳбатҳои профилактикию корҳои фаҳмондадиҳӣ роҳандозӣ шуда истодааст.

Аз ҷумла, дар ҷараёни баргузории чорабиниҳои профилактикии мазкур ҳолатҳои зиёди бе зарурат дар кӯча ва бе назорат гаштугузор намудани ҷавонон махсусан кӯдакони хурдсол бе ниқоби муҳофизатӣ муайяну ошкор карда шуд.

Мавриди зикр аст, ки кӯдакони хурдсол, ки ҳанӯз хуб инкишоф наёфтаанд ва ба таври кофӣ қоидаҳои беҳдоштиро риоя намекунанд, ҳангоми ба берун баромадан эҳтимоли гирифторшавӣ ба бемориҳои сироятиро бештар доранд. Аз ин лиҳоз метавон гуфт, ки кӯдакон метавонанд интиқолдиҳандаи беморӣ аз кӯча ба хона гардида, дигар аъзои хонаводаи худро сироят намоянд. Бо назардошти ҳолатҳои мазкур аз ҷониби Ситоди ҷумҳуриявӣ қарори дахлдор қабул гардида, муассисаҳои таҳсилоти миёнаи ӯмумӣ аз муҳлати муайян гардида барвақттар рухсат дода шудаанд. То ноболиғони хурдсол камтар ба берун бароянду аз гирифторшавӣ ба ин беморӣ эмин бимонанд. Вале чуноне дар рафти амалиёти мазкур кормандони милитсияи пойтахт ошкор намуданд, кӯдакони хурдсол аз бемасъулиятии волидайни худ истифода бурда, шабонарӯзӣ ба кучагардӣ машғул мебошанд.

Аз ин лиҳоз, кормандони милитсияи пойтахт, бо он нафароне, ки зимни баргузории ин амалиёти профилактикӣ дар кӯчаву хиёбонҳои пойтахт бе ниқобҳои муҳофизатии тиббӣ ба гаштугузор машғул буданд, суҳбатҳои профилактикӣ ва корҳои фаҳмондадиҳӣ гузарониданд.

Кормандони Раёсати ВКД дар шаҳри Душанбе ҷиҳати пешгирии сироятёбӣ ба ин беморӣ ва баланд бардоштани маърифатнокиву иттилоърасонии шаҳрвандон дар кӯчаву хиёбонҳои шаҳри Душанбе амалиётҳои профилактикиву корҳои фаҳмондадиҳиро идома дода, кормандони ин ниҳод ҷиҳати ҳифзи солимии ҷомеа саҳми худро мегузоранд.

Июнь 10, 2020 13:22

Хабарҳои дигари ин бахш

Ягона роҳи пешгирии бемории сурхча ва гулафшон иммунизатсия мебошад
Дар беш аз 400 муассисаи тандурустии Тоҷикистон воситаҳо барои пардохти электронӣ насб гардиданд
Дар шаҳри Турсунзода биноҳои Маркази касбомӯзӣ ва раёсати Агентии меҳнат ва шуғли аҳолӣ бунёд мегарданд
Озмунҳои ҷумҳуриявии «Беҳтарин ҳамсар» ва «Фарзанд-боғи падару модар» ҷамъбаст мегарданд
Ҷаласаи V Шурои ҳамоҳангсози мақомоти ваколатдори давлатҳои аъзои СААД баргузор гардид
Дар Тоҷикистон ҳавои фасли тирамоҳ чӣ гуна мешавад?
Дар Коллеҷи технологии шаҳри Душанбе 5 синфхонаи иловагӣ ба истифода дода мешавад
Дар назди Коллеҷи тиббии ҷумҳуриявӣ бинои нави клиника ва дармонгоҳ бунёд мегардад
Соли равон 37 муассисаи таҳсилоти ибтидоии касбӣ таъмир ва навсозӣ мегардад
Кормандони Кумита оид ба таҳсилоти ибтидоӣ ва миёнаи касбӣ суханронии Сарвари давлатро ба муносибати Рӯзи дониш якҷоя тамошо намуданд
Ба намояндагони касбу кори гуногуни вилояти Хатлон мукофотҳои давлатӣ тақдим карда шуд
«Барномаи рушди соҳаҳои таҳсилоти ибтидоӣ ва миёнаи касбии Ҷумҳурии Тоҷикистон барои солҳои 2026-2030» қабул гардид