Ҳарифони дастаи мунтахаби Тоҷикистон имрӯз муайян мешаванд

ДУШАНБЕ, 18.06.2020 /АМИТ «Ховар»/. Имрӯз, дар қароргоҳи Конфедератсияи футболи Осиё воқеъ дар шаҳри Куала-Лумпур қуръакашии Чемпионати Осиё-2020 миёни футболбозони навраси то 16 ва 19 сола доир мегардад, ки дар ин ҷо ҳарифони футболбозони тоҷик мауйян мегарданд. Маросими қуръакашӣ соати 11:30 ба вақти Душанбе оғоз шуда, то 13:30 идома мекунад. Дар ин бора мухбири АМИТ «Ховар» Меҳрони  Қурбон бо истинод ба Федератсияи футболи Тоҷикистон иттилоъ медиҳад.

Қобили зикр аст, ки Чемпионати Осиё-2020 аз 14  то 31  октябр дар Ӯзбекистон доир мегардад. Хотиррасон мекунем, ки 4 дастаи беҳтарини мусобиқоти мазкур роҳхати Чемпионати ҷаҳон-2021, ки баргузориаш дар Перу ва Индонезия дар назар аст, роҳхат мегиранд.

Ҳайати сабадҳо барои маросими қуръакашии Чемпионати Осиё-2020 (U-16):

Сабади 1: Баҳрайн, Ҷопон, Тоҷикистон, Кореяи Ҷанубӣ.

Сабади 2: Австралия, ҶДХК, Индонезия, Умон.

Сабади 3: Ҳиндустон, Эрон, Яман, Арабистони Саудӣ.

Сабади 4: Чин, Ӯзбекистон, Қатар, АМА.

Ҳайати сабадҳо барои маросими қуръакашии Чемпионати Осиё-2020 (U-19):

Сабади 1: Ӯзбекистон, Арабистони Саудӣ, Кореяи Ҷанубӣ, Қатар.

Сабади 2: Ҷопон, Тоҷикистон, Австралия, Индонезия.

Сабади 3: Малайзия, Ироқ, Ветнам, Камбоҷа.

Сабади 4: Эрон, Яман, Баҳрайн, Лаос.