Имрӯз вазоратҳои энергетика ва захираҳои об, адлия, кишоварзӣ, Хадамоти алоқа нишасти матбуотӣ доранд

ДУШАНБЕ, 13.07.2020 /АМИТ «Ховар»/. Имрӯз, 13 июл Вазорати энергетика ва захираҳои оби Ҷумҳурии Тоҷикистон, Вазорати адлияи Ҷумҳурии Тоҷикистон, Вазорати кишоварзии Ҷумҳурии Тоҷикистон, Академияи илмҳои кишоварзии Тоҷикистон, Хадамоти алоқаи назди Ҳукумати Ҷумҳурии Тоҷикистон оид ба ҷамъбасти фаъолияташон дар нимсолаи якуми соли 2020 нишасти матбуотӣ баргузор менамоянд.

Нишастҳои матбуотии Вазорати адлия соати 09:00, Хадамоти алоқа соати 11:00 ва Вазорати энергетика ва захираҳои об соати 15:30 дар Маркази матбуоти ҷумҳуривии АМИТ «Ховар» баргузор мешаванд.

Вазорати кишоварзӣ дар якҷоягӣ бо Академияи илмҳои кишоварзӣ соати 14:00 дар маҷлисгоҳи Донишгоҳи аграрии Тоҷикистон ба номи Шириншоҳ Шоҳтемур нишасти матбуотиро барпо менамояд.

Масъулини вазорату идораҳо ва ташкилоту муассисаҳое, ки дар ҳудуди шаҳри Душанбе фаъолият мекунанд, вақти баргузор намудани нишастҳои матбуотиро бо АМИТ «Ховар» ҷиҳати дар толори Маркази матбуоти ҷумҳуриявӣ  (хиёбони Рӯдакӣ, 40, ошёнаи 2, телефонҳои 221-34-24, 888-08-34-04) гузаронидан, мувофиқа мекунанд.

Ҳар рӯзи корӣ дар сомонаи АМИТ «Ховар» —www.khovar.tj  эълонҳо оид ба вақт ва макони баргузоршавии нишастҳои матбуотии вазорату идораҳо ва ташкилоту муассисаҳо ба забонҳои тоҷикӣ ва русӣ нашр карда мешаванд.

Ёдовар мешавем, ки нишастҳои матбуотии вазорату идораҳо, ташкилоту муассисаҳо тибқи нақшаи тасдиқкардаи Дастгоҳи иҷроияи Президенти Ҷумҳурии Тоҷикистон аз 13 июл оғоз гардида, 31 июл ба анҷом мерасанд.

Бо назардошти аз байн нарафтани хавфи мубталошавӣ ба коронавирус, ба диққати масъулин ва иштирокчиёни нишастҳои матбуотӣ расонида мешавад, ки талаботҳои беҳдоштии муайяннамудаи Ситоди ҷумҳуриявӣ оид ба пурзӯр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID-19-ро қатъиян риоя намоянд.