Олимҷон Муҳаммадҷонзода: «Барои рушди забони давлатӣ ба Ҳукумати мамлакат барномаи нав пешниҳод шудааст»

Июль 29, 2020 12:50

ДУШАНБЕ, 29.07.2020 /АМИТ «Ховар»/. Интизор меравад, ки дар ояндаи наздик лоиҳаи Барномаи рушди забони давлатӣ барои солҳои 2020-2030 аз ҷониби Ҳукумати Ҷумҳурии Тоҷикистон тасдиқ гардад. Ин матлабро Раиси Кумитаи забон ва истилоҳоти назди Ҳукумати Ҷумҳурии Тоҷикистон, доктори илмҳои филологӣ, профессор Олимҷон Муҳаммадҷонзода имрӯз зимни нишасти матбуотӣ дар ҷамъи хабарнигорон иброз дошт.

Ба иттилои номбурда, лоиҳаи барномаи нави рушди забони давлатӣ аз ҷониби Кумита таҳия ва ба Ҳукумати Ҷумҳурии Тоҷикистон пешниҳод шудааст. Барномаи мазкур ҳадаф, вазифа, усулҳои татбиқ, самтҳои асосии ташаккул ва такомули забони давлатиро муайян намуда, дар ду марҳила ва шаш самт роҳандозӣ мегардад.

Марҳилаи аввал солҳои 2020-2025-ро дар бар гирифта,  таҳияи лоиҳаҳо барои ворид намудани тағйиру иловаҳо ба санадҳои меъёриву ҳуқуқӣ ва такмили қонунгузории соҳавиро фаро мегирад. Марҳалаи дуюм солҳои 2026-2030-ро дар бар гирифта, аз роҳҳои амалисозии масъалаҳои таҳқиқотии омӯзиши назорат ва ташкилӣ иборат мебошад.

Дар барнома таъмини рушди забони давлатӣ аз рӯи якчанд самт, аз ҷумла андешидани тадбирҳо барои таъмини заминаи меъёриву ҳуқуқӣ, таҳқиқи масъалаҳои назариявӣ ва амалияи забони давлатӣ,  таҳия ва нашри фарҳангномаҳо ва дастурамалҳо, омӯзиш, назорат, таҳлил ва амалӣ сохтани сиёсати давлатии забон, ҳифзи забонҳои миллатҳо ва халқиятҳои ҳудуди Ҷумҳурии Тоҷикистон, пеш аз ҳама, он забонҳое, ки дар мамлакат мавриди истифода қарор доранд, муайян мегарданд. Як бахши муҳими ин барнома ба ҳифзи забонҳои яғнобӣ ва бадахшонӣ бахшида шудааст.

Таҳкими робитаҳои байналмилалӣ дар ҳимоя ва рушди забони давлатӣ берун аз марзи Тоҷикистон аз ҳадафҳои дигари барнома ба шумор меравад. Дар вазъияти пандемия зарурат пеш омад, ки муҳассилин аз таҳсилоти фосилавӣ истифода баранд. Бо назардошти шароити имрӯзаи мамлакат ва ҷаҳон дар барнома омода кардани шаклҳои электронии фарҳангҳо, луғатномаҳо, китобҳои дарсӣ, дастурамал ва он воситаҳои таълимие, ки дар Тоҷикистон нашр мешаванд, низ ба назар гирифта шудааст.

«Дар маҷмӯъ дар барнома татбиқи давра ба давраи рушди забони давлатӣ дар ҳама соҳаҳои иҷтимоиву иқтисодӣ пешбинӣ гардидааст. Амалӣ гардидани ҳадафҳои ин барнома тӯли солҳои пешбинишуда ва марҳалаҳои баъдӣ барои рушди забони давлатӣ ва меъёрҳои он мусоидат хоҳад кард. Агар лоиҳаи барномаи навбатӣ аз ҷониби Ҳукумати Ҷумҳурии Тоҷикистон тасдиқ гардад, дастоварди навбатӣ дар роҳи татбиқи сиёсати давлатӣ дар мамлакат хоҳад буд»,-хулоса намуд Раиси Кумитаи забон ва истилоҳоти назди Ҳукумати Ҷумҳурии Тоҷикистон Олимҷон Муҳаммадҷонзода.

Барномаи рушди забони давлатӣ барои солҳои 2020-2030 дар даврони соҳибистиқлолиии мамлакат сеюмин барномаест, ки аз ҷониби Кумитаи забон ва истилоҳот таҳия ва пешниҳод мешавад.

Июль 29, 2020 12:50

Хабарҳои дигари ин бахш

Иштирокдорони Форуми XVIII зиёиёни эҷодкор ва олимони кишварҳои ИДМ бо таъриху тамаддуни тоҷикон шинос шуданд
«НИДОИ ЛОЗУР». Таҳти чунин унвон Форуми пиряхҳо ва барномаи фарҳангӣ баргузор мегардад
Форуми XVIII зиёиёни эҷодкор ва олимони кишварҳои аъзои Иттиҳоди Давлатҳои Мустақил баргузор шуд
Академияи миллии илмҳои Тоҷикистон ва Донишгоҳи миллии техникии Беларус ҳамкории илмиро тақвият медиҳанд
Дар Душанбе Форуми зиёиёни эҷодкор ва олимони давлатҳои иштирокдори Иттиҳоди Давлатҳои Мустақил оғоз шуд
Дар Тоҷикистон Рӯзҳои фарҳанги Озарбойҷон доир мешаванд
«ШАБЕ ДАР ОСОРХОНА». Ин иқдом ба Рӯзи байналмилалии осорхонаҳо бахшида мешавад
Дар шаҳри Қазвини Эрон фарҳанги Тоҷикистон муаррифӣ карда шуд
Дар Донишкадаи давлатии санъати тасвирӣ ва дизайн Фестивали мӯд-2025 баргузор шуд
ИМРӮЗ-РӮЗИ ШАШМАҚОМ. Ин шоҳасари мадании мусиқии тоҷик чун мероси аҷдодӣ давоми асрҳо аз устод ба шогирд гузаштааст
Даҳаи дуюми моҳи май 115-солагии Шоири халқии Тоҷикистон Боқӣ Раҳимзода ҷашн гирифта мешавад
Дар Донишгоҳи технологии Тоҷикистон озмуни «Ҳар он кас, ки шоҳномахонӣ кунад» баргузор шуд