Дар Чин барои ваксинаи зидди COVID-19 нахустин патент дода шуд

ДУШАНБЕ, 18.08.2020 /АМИТ «Ховар»/. Аввалин патент барои ваксинаи COVID-19 дар Чин аз ҷониби Идораи давлатии моликияти зеҳнии Ҷумҳурии Мардумии Чин дода шудааст, хабар медиҳад АМИТ «Ховар» бо истинод ба Агентии давлатии иттилоотии «Синхуа».

Дархост барои дарёфти патент аз тарафи гурӯҳи таҳқиқотии Академияи илмҳои низомӣ ва ширкати технологии CanSino Biologics Inc. пешниҳод шудааст, — омадааст дар хабари рӯзномаи «Жэнмин жибао» (People’s Daily).

Гурӯҳ  бо роҳбарии Чен Вэй, як пажӯҳишгари Институти тиббии ҳарбии Академияи мазкур ваксини рекомбинати COVID-19-ро коркард намуд.

Моҳи марти имсол ин ваксина  аввалин ваксинаи дар Чин тасдиқшуда гардид ва  барои санҷиши клиникӣ маъқул дониста шуд.

Тибқи хулосаи патент, ваксина дорои хусусиёти хуби иммуногениест, ки ҳангоми озмоиш дар мушҳо ва хукчаҳои дарёӣ мушоҳида гардид ва он дар як муддати кӯтоҳ вокуниши эминии баданро ба вуҷуд меорад. Ваксинаро зуд дар ҳаҷми калон барои мубориза бо хуруҷи COVID-19 истеҳсол кардан мумкин аст.

Марҳалаҳои аввал ва дуюми озмоишҳои клиникии ин ваксина ба анҷом  расида, нишон доданд, ки он бехатар ва иммуногенӣ аст, — гуфта шудааст дар хабари нашрия.

АКС аз манобеи кушода