Дар ноҳияи Абдураҳмони Ҷомӣ заминҳои наздиҳавлигӣ самаранок истифода мешаванд

ДУШАНБЕ, 18.08.2020 /АМИТ «Ховар»/. Раиси вилояти Хатлон Қурбон Ҳакимзода бо мақсади шиносоӣ бо ҳолати истифодаи самарабахши заминҳои наздиҳавлигӣ ва шароити зисти  аҳолӣ аз қитъаи замини сокини деҳаи Бӯстони ноҳияи Абдураҳмони Ҷомӣ Пӯлод Миров дидан намуд. Дар ин бора аз мақомоти иҷроияи ҳокимияти давлатии вилояти Хатлон ба АМИТ «Ховар» хабар доданд.

Пӯлод Мирови 78-сола, ки маълумоти олии иқтисодӣ дорад, ҳоло  нафақагир асту дар замини наздиҳавлигиаш деҳқонӣ мекунад. Замини наздиҳавлигии ин марди деҳқон 0,15 га буда, ҳар ваҷаби он самаранок истифода бурда мешавад.

Тавре ки Пӯлод Миров ба раиси вилоят иттилоъ дод, дар ин қитъа баъд аз ҷамъоварии ҳосили якум кишти такрории зироат, аз ҷумла маккаи дон, лӯбиё, мош, картошка ва дигар намуди сабзавот барои аҳли оила парвариш мешавад, ки феълан нашъунамои хуб доранд.

Дар хонаводаи Пӯлод Миров аз ҳосили маҳсулоти замини наздиҳавлигиашон ҳамасола барои оила зиёда аз 300 дона банка хӯришҳои гуногун ва мураббо захира менамоянд.

Раиси вилоят Қурбон Ҳакимзода зикр кард, ки ҳар як оилаи деҳотӣ бояд аз замини наздиҳавлигӣ оқилонаю пурсамар истифода бурда,  дар таъмини амнияти ғизоӣ саҳм гузорад.