Дар Тоҷикистон ҳаҷми истеҳсоли маҳсулоти кишоварзӣ 8,5 фоиз афзоиш ёфтааст
ДУШАНБЕ, 02.11.2026 /АМИТ «Ховар»/. Дар нуҳ моҳи соли равон ҳаҷми истеҳсоли маҳсулоти кишоварзӣ дар ҳамаи шаклҳои хоҷагидории ҷумҳурӣ ба 67,1 миллиард сомонӣ расида, нисбат ба ҳамин давраи соли гузашта 8,5 фоиз афзоиш ёфтааст. Дар ин хусус ба АМИТ «Ховар» аз Вазорати кишоварзии Ҷумҳурии Тоҷикистон иттилоъ доданд.
Дар ҳаҷми умумии маҳсулоти кишоварзӣ ҳиссаи хоҷагиҳои ҷамоавӣ ва деҳқонӣ 47,8 фоиз ва бахши аҳолӣ 52,2 фоизро ташкил медиҳад. Дар сохтори ҳаҷми умумии истеҳсоли маҳсулоти кишоварзӣ саҳми вилояти Хатлон 53,3 фоиз, вилояти Суғд 31,4 фоиз, Вилояти Мухтори Кӯҳистони Бадахшон 1,1 фоиз, шаҳри Душанбе якҷо бо шаҳру ноҳияҳои тобеи ҷумҳурӣ 14,2 фоизро ташкил медиҳад.
Афзоиши ҳаҷми истеҳсоли маҳсулоти кишоварзӣ нисбат ба ҳамин давраи соли гузашта асосан аз ҳисоби зиёд гардидани истеҳсоли картошка, сабзавот, зироати полезӣ, ангур, маҳсулоти чорводорӣ ва дигар маҳсулоти кишоварзӣ таъмин гардидааст.
Бояд гуфт, ки ҳаҷми умумии маҳсулоти кишоварзӣ соли 2025 ба 85 миллиард сомонӣ расида, нисбат ба соли 1991 3,7 баробар афзоиш ёфтааст. Соҳаи кишоварзии мамлакат беш аз 21 фоизи Маҷмуи маҳсулоти дохилиро фаро гирифта, зиёда аз 61 фоизи аҳолиро бо ҷойи кор таъмин менамояд.
Ёдовар мешавем, ки дар натиҷаи тадбирҳои андешида сатҳи таъминнокии аҳолӣ бо маҳсулоти асосии ғизоӣ нисбат ба талаботи меъёрҳои физиологӣ баланд гардид. Дар давраи соҳибистиқлолӣ истеҳсоли картошка 135,4 фоиз, сабзавот 2,4 маротиба, пиёз 4 маротиба, сабзӣ 3,9 маротиба, полезӣ 3,9 маротиба, мева ва ангур 100 фоиз, гӯшт 104,1 фоиз, шир 100 фоиз ва тухм 74 фоиз таъмин гардид.
Кишоварзӣ дар Тоҷикистон яке аз соҳаҳои муҳимтарини иқтисоди миллӣ буда, таъмини ҳадафи стратегии Ҳукумат, яъне амнияти озуқавории мамлакат асосан аз сатҳи рушди он вобаста мебошад.
Президенти Ҷумҳурии Тоҷикистон муҳтарам Эмомалӣ Раҳмон 8 сентябри соли равон зимни суханронӣ бахшида ба 35–солагии Истиқлоли давлатӣ иброз доштанд, ки «ҳоло маҳсулоти кишоварзии мо ба зиёда аз 30 мамлакат ҷаҳон содирот карда мешавад».
Тавре аз Агентии содироти назди Ҳукумати Ҷумҳурии Тоҷикистон иттилоъ доданд, дар шаш моҳи соли равон аз Тоҷикистон ба маблағи 40 миллиону 500 ҳазор доллар маҳсулоти кишоварзӣ содирот шудааст, ки нисбат ба ҳамин давраи соли 2025 ба маблағи 6,7 миллион доллар ё 19,7 фоиз зиёд мебошад. Аз маблағи умумии 40 миллиону 500 ҳазор доллар ба маблағи 26,5 миллион доллар меваи хушк, 7 миллион доллар меваҷот, 6 миллион доллар сабзавот ва 1 миллион доллар дигар намуди маҳсулоти кишоварзӣ содирот шудааст.
Маҳсулоти кишоварзӣ ба 21 давлати дуру наздик роҳ ёфта, 89 фоизи он ба кишварҳои Иттиҳоди Давлатҳои Мустақим ва 11 фоиз ба давлатҳои хориҷи дур рост меояд.
АКС: АМИТ «Ховар»








Барои рушди соҳаи боғу токпарварӣ — барномаи чоруми давлатӣ татбиқ мегардад
«БАРНОМАИ МИЁНАМУҲЛАТИ РУШДИ ИҚТИСОДИ РАҚАМӢ».Мутахассис ин мавзуъро шарҳ медиҳад
ТИҶОРАТИ РАҚАМӢ. Он ба густариши фаъолияти соҳибкорӣ ва баланд бардоштани рақобатпазирии иқтисоди миллӣ мусоидат менамояд
МАСЛИҲАТИ МУТАХАССИС. Барои ҳифзи боғҳо корҳои агротехникии тирамоҳӣ аҳамияти муҳим доранд
Истгоҳи обуҳавосанҷии Горбунов дар пиряхи «Тоҷикистон» навсозӣ карда мешавад
ҚАТЪНОМАИ ТАЪРИХӢ БАРОИ ОСИЁИ МАРКАЗӢ. Чӣ гуна ташаббуси Президенти Тоҷикистон зеҳни сунъиро ба рӯзномаи Маҷмаи Умумии СММ ворид кард
Ба бунёди боғҳои интенсивӣ ва суперинтенсивӣ таваҷҷуҳро бештар намоем. Шарҳи коршинос
Ҳаҷми маблағгузории Фонди иқлими сабз барои Тоҷикистон ба 235 миллион доллар расидааст
Ҷаласаи навбатии Гурӯҳи кории байниидоравӣ оид ба мониторинг ва арзёбии ҳуҷҷатҳои банақшагирии стратегӣ доир шуд
«БАРНОМАИ ДАВЛАТИИ РУШДИ МАЪРИФАТ ВА ФАРҲАНГИ ЭКОЛОГӢ». Он ба баланд бардоштани фарҳанги экологии аҳолӣ равона шудааст
Тоҷикистон дар COP31 таъсиси платформаи минтақавии инноватсияҳои «сабз»-ро дар Осиёи Марказӣ пешниҳод намуд
Директори Агентии авиатсияи гражданӣ Ҳабибулло Назарзода дар Ассамблеяи 43-юми ИКАО дар шаҳри Монреали Канада иштирок намуд






