Дар Тоҷикистон ба муносибати 30-солагии Истиқлолияти давлатӣ 358 муассисаи тандурустӣ бунёд мегардад

ДУШАНБЕ, 18.08.2020 /АМИТ «Ховар»/. Дар шаҳру ноҳияҳои мамлакат ба муносибати 30-солагии Истиқлолияти давлатӣ давоми солҳои 2018-2021 бунёди 358 муассисаи тандурустӣ ба нақша гирифта шуда буд, ки аз ин ҳисоб 276 муассиса то аввали июли соли 2020 ба истифода дода шуданд. Сохтмони 132 иншооти дигар то охири соли 2021 ба нақша гирифта шудааст. Дар ин бора имрӯз Пешвои миллат муҳтарам Эмомалӣ Раҳмон зимни суханронӣ дар мулоқот бо кормандони соҳаи тандурустӣ изҳор доштанд.

Президенти мамлакат муҳтарам Эмомалӣ Раҳмон дар ин мулоқот иброз доштанд, ки «агар дар кишвар то соли 1991 ҳамагӣ 2862 муассисаи тандурустӣ фаъолият дошта бошад, пас дар замони соҳибистиқлолӣ ин шумора қариб ду баробар афзуда, соли 2020  ба 4369 адад расидааст, яъне 1507 муассиса зиёд шудааст. Агар дар давраи солҳои 1991 то 2005 дар мамлакат ҳамагӣ 187 муассисаи тандурустӣ бунёд шуда бошад, пас аз соли 2006 то шаш моҳи аввали соли 2020-ум 1071 муассисаи нави соҳа  ба истифода дода шудааст».

Сарвари давлат зикр намуданд, ки имрўз дар мамлакат шумораи табибон беш аз 19 ҳазор нафарро ташкил медиҳад, ки дар муқоиса бо соли 1991-ум 29 фоиз, нисбат ба соли 2000-ум 32 фоиз ва назар ба соли 2010-ум беш аз 19 фоиз зиёд мебошад.

Тавре Раиси вилояти Суғд Раҷаббой Аҳмадзода дар ҳамоиши тантанавӣ бахшида ба Рӯзи кормандони соҳаи тиб, ки 15 август дар Қасри Арбоб доир шуд, гуфт, ки дар доираи омодагиҳо ба ҷашни таърихии 30-солагии Истиқлолияти давлатии Ҷумҳурии Тоҷикистон дар вилояти Суғд бо маблағгузорӣ аз ҳамаи сарчашмаҳо сохтмон, таъмир ва навсозии 459 иншооти соҳа ба нақша гирифта шуда, то имрӯз сохтмон ва таъмиру навсозии даҳҳо иншоот ба итмом расонида шудааст.

Дар ҷамъомади тантанавӣ ба муносибати Рӯзи кормандони соҳаи тиб дар вилояти Суғд таъкид шуд, ки алҳол дар муассисаҳои тиббии вилоят 5276 нафар духтур, 17945 нафар корманди миёнаи тиб ва 6390 нафар корманди хурди тиб ба аҳолӣ содиқона хизмат мерасонанд. Умед аст, ки кормандони соҳа дар оянда ҳам баҳри нигаҳдории тандурустии аҳолӣ меҳнати шоиста мекунанд.

Дар робита ба ин, гурӯҳи калони кормандони муассисаҳои тиббии шаҳру ноҳияҳои вилоят, ки дар пешрафти соҳа, пешгирӣ ва муолиҷаи бемории сироятии COVID–19 саҳми босазо гузоштаанд, бо Сипосномаи мақомоти иҷроияи ҳокимияти давлатии вилояти Суғд  ва туҳфаҳои хотиравӣ сарфароз гардонида шуданд.

ДАР АКС: Ба истифода додани бинои нави Беморхонаи сироятӣ дар деҳоти Хистеварзи ноҳияи Бобоҷон Ғафуров 30.06.2020