ИСТЕҲСОЛИ ОРД ДАР ТОҶИКИСТОН АФЗУДААСТ. Оё корхонаҳои ордбарорӣ талаботи бозори дохилиро пурра таъмин карда метавонанд?
ДУШАНБЕ, 05.08.2020 /АМИТ «Ховар»/. Айни замон дар ҷумҳурӣ 47 корхонаҳои ордбарорӣ фаъолият дошта, танҳо дар шашмоҳаи аввали соли равон 374 ҳазору 982 тонна орд истеҳсол намудаанд, ки ин нисбат ба ҳамин давраи соли 2019 43 ҳазору 136 тонна зиёд мебошад. Дар ин бора Вазири саноат ва технологияҳои нави Ҷумҳурии Тоҷикистон Заробиддин Файзуллозода зимни натиҷагирӣ аз фаъолияти корхонаҳои саноатӣ дар шашмоҳаи аввали соли 2020 хабар дод.
Тавре иттилоъ доред, бо сабаби паҳн шудани бемории коронавирус дар ҷаҳон аввалҳои моҳи март дар ҷумҳурӣ арзиши орд ба таври сунъӣ боло рафт. Дар шарҳи ин масъала Вазири саноат ва технологияҳи нав гуфт, ки «имрӯз корхонаҳои ордбарории мамлакат на танҳо имконияти таъмини пурраи аҳолиро бо орди хушсифати ватанӣ доранд, балки ба кишварҳои ҳамсоя, назири Ҷумҳурии Исломии Афғонистон низ содироти онро ба роҳ мондаанд».
Вазири саноат ва технологияҳои нави
Ҷумҳурии Тоҷикистон Заробиддин Файзуллозода
«Тоҷирон ё шахсони манфиатдоре, ки ба таври сунъӣ арзиши ордро боло бурданд, аз вазъи бозор бехабаранд, зеро дар чанд соли охир корхонаҳои мо Тоҷикистонро пурра бо орди ватанӣ таъмин мекунанд. Дилхоҳ корхона метавонад аз хориҷи мамлакат ба ҷумҳурӣ гандум ворид намояд, зеро дар ин самт ягон мушкилӣ ҷой надорад. Танҳо ширкатҳоеро, ки гандум ворид месозанд, зарур аст истеҳсоли ордро ба роҳ монанд»-, афзуд вазир.
Мавсуф гуфт, ки дар шашмоҳаи аввали соли 2020 воридоти гандум камтару орд бештар шудааст.
Вазири саноат ва технологияҳои нав ба савол оид ба он ки истеҳсоли орд нисбат ба ҳамин давраи соли гузашта зиёд шудаасту чаро арзишаш поён намеравад, чунин посух гуфт: «Бештари гандум аз Ҷумҳурии Қазоқистон ва Федератсияи Россия ворид мешавад, ки арзиши он дар кишварҳои истеҳсолкунанда низ боло рафтааст. Агар хоҷагиҳои деҳқонӣ тавонанд корхонаҳои ватаниро бо гандуми дохилӣ пурра таъмин намоянд, дар ин сурат арзиши орд низ поён меравад».
Бояд гуфт, ки дар бозорҳои шаҳри Душанбе ва ноҳияҳои атроф айни замон арзиши як халта орди 50 кг навъи якум аз 227 сомонӣ шурӯъ мешавад.
Тавре аз Агентии омори назди Президенти Ҷумҳурии Тоҷикистон ба мо иттилоъ доданд, дар саросари ҷумҳурӣ аз ҷониби хоҷагиҳои деҳқонӣ ба ҳолати 1 июли имсол 527 ҳазору 570,5 тонна гандум истеҳсол гардидааст, ки нисбат ба ҳамин давраи соли гузашта 30,1 ҳазор тонна зиёд мебошад. Масъулини Вазорати кишоварзӣ ба мо гуфтанд, ки ҷамъоварии ҳосили гандум ҳоло идома дошта, майдони кишти ғаладонагиҳо имсол бештар мебошад.
Ёдовар мешавем, ки дар натиҷаи рушди соҳаи саноат сол то сол талаботи бозори дохилии ҷумҳурӣ бо маҳсулоти воридотивазкунандаи истеҳсоли орди ватанӣ таъмин карда мешавад. Соли 2019 талаботи бозори дохилӣ дар ҳаҷми 710,1 ҳазор тонна орд пурра таъмин карда шуда, 3132,5 тонна орд ба хориҷи мамлакат содир шудааст.
Абдураҳими АБДУҚАҲҲОР,
АМИТ «Ховар»
«Саноатсодиротбонк» ба натиҷаҳои назарраси молиявӣ ноил гардид
Бунёди зеристгоҳи нави барқии 220 кВ дар шаҳри Душанбе ва таҷдиду навсозии НБО «Варзоб-2» баррасӣ гардид
Дастовардҳои миллии Тоҷикистон дар Намоишгоҳи кишварҳои ИДМ муаррифӣ гардиданд
Дар Душанбе Форуми сеюми соҳибкории кишварҳои Осиёи Марказӣ ва Амрико доир мегардад
ИМРӮЗ-РӮЗИ ҶАҲОНИИ ПОЧТА. «Почтаи Тоҷикистон» то соли 2030 ба маркази миллии логистика ва хизматрасониҳои рақамӣ табдил меёбад
Дар Тоҷикистон беш аз 300 тонна пилла истеҳсол гардидааст
Дар Душанбе масъалаи рушди технологияҳои рақамӣ ва ҳифзи кӯдакон дар муҳити рақамӣ баррасӣ гардид
Корхонаи коркарди пахтаи ноҳияи Фархор баъд аз таъмир ба истифода дода шуд
РӮЗИ ҶАҲОНИИ ПАХТА. Як килограмм нахи пахта дар бозори ҷаҳонӣ ба 16 килограмм гандум баробар аст
«БАРНОМАИ РУШДИ САЙЁҲИИ ДОХИЛӢ». Дар Тоҷикистон беш аз 400 захираи сайёҳӣ, 1000 дара, 1000 кӯл ва мавзеъҳои дигари ҷолиб мавҷуд аст
Дурнамои рушди соҳаи сохтмони Тоҷикистон дар форуми байналмилалӣ дар Екатеринбург муаррифӣ гардид
Лоиҳаи «Дастрасӣ ба бозорҳо ва мутобиқшавӣ барои чорводорӣ» татбиқ мегардад
