Шумораи ҷонбохтагони таркиш дар Бейрут ба 135 нафар расид

ДУШАНБЕ, 06.08.2020 /АМИТ «Ховар»/. Шумораи ҷонбохтагони  таркиш  дар пойтахти Лубнон – Бейрут  ба  135 нафар расид, хабар медиҳад АМИТ «Ховар» бо истинод ба канали телевизионии «Al Jazeera». 

Мутобиқи маълумоти  бадастомада, дар ин таркиш ҳадди аққал 135  кас  ҷон бохта,  тахминан  5 ҳазор  нафари дигар  захмӣ шудаанд.

Мақомоти расмӣ  иброз доштааст, ки  эҳтимоли  зиёд  гардидани   шумораи ҷонбохтагон  вуҷуд дорад,  чунки наҷотдиҳандагон ҷустуҷӯйи одамони зиндамонадаро дар зери  биноҳои валангор идома медиҳанд.

Губернатори Бейрут Марван Аббуд гуфт, ки  дар шаҳр то 300,000 нафар бесарпаноҳ мондаанд. Мақомот барои бо ғизо, об ва манзил тамин намудани онҳо кӯшиш мекунад. Таркиш  дар бандари Бейрут шоми 4 август рух дод. Мақомоти маҳаллӣ сабаби  ин ҳодисаро таркиши 2,7 ҳазор тонна нитрати аммиак, ки дар анбори бандар нигоҳдорӣ мешуд, номиданд. Ин маводро соли 2015 хадамоти гумрук мусодира  намуда, онро  дар бандари мазкур  нигоҳдорӣ мекардааст. Дар Бейрут барои ду ҳафта  вазъияти фавқулода эълон шудааст, назорати амният  дар пойтахт ба дӯши низомиён вогузор шудааст.