Президенти мамлакат Эмомалӣ Раҳмон Варзишгоҳи марказии ноҳияи Мастчоҳро бо 10 ҳазор ҷойи нишаст ифтитоҳ намуданд ва бо сокинону фаъолони ноҳия мулоқот карданд

Сентябрь 14, 2020 20:01

ДУШАНБЕ, 14.09.2020. /АМИТ «Ховар»/. Дар ноҳияи Мастчоҳ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Варзишгоҳи марказии ноҳияро бо 10 ҳазор ҷойи нишаст ифтитоҳ карда, дар ҳамин ҷо бо роҳбарон ва фаъолону сокинони ноҳия мулоқот карданд.

Майдони умумии варзишгоҳ 3,2 гектарро ташкил дода, корҳои сохтмонӣ дар он аз соли 2016 оғоз гардида буданд

Варзишгоҳ дар шаҳраки Бӯстон бо маблағгузории Дирексияи сохтмони иншоотҳои ҳукуматии Дастгоҳи иҷроияи Президенти Ҷумҳурии Тоҷикистон аз тарафи пудратчиён Ҷамъияти дорои масъулияти маҳдуди «Сохтмон», «Темурҷон» ва «Эъҷози ҳунар» сохта шуд.

Варзишгоҳ аз чор минбари нишастгоҳ ва ҳамчунин барои меҳмонони олиқадр ҷойи махсус иборат аст.

Масоҳати майдон барои бозии футбол бо андозаҳои 105 метр бар 68 метр мебошад.

Дар ошёнаи 1-ум утоқи кории директор, ҳуҷраи маъмурият, толори машқи бадан, тениси рӯи миз, бунгоҳи тиббӣ, ҳуҷраи назорати допингӣ, ҳуҷраи нигоҳи бозингарон, ҳуҷраи интизорӣ, ҳуҷраи либоскашӣ, утоқи муррабӣ, душхона, ҳочатхона, анбори таҷҳизоти варзишӣ, ҳуҷраи техникӣ, ошхона, шустушӯи зарфҳо, анбор, хол ва роҳрав ҷойгир аст.

Дар ошёнаи 3-юм ҳуҷраи меҳмонон, ҳуҷраи истироҳатӣ ва ҳуҷраи санитарӣ ҷойгир шудааст.

Дар минбари шарқи ҳуҷраи доварон, ҳуҷраи инспекторон, ҳуҷраи муррабӣ, ҳуҷраи либоскашии варзишгарон, ҳуҷраи маҳс, ҳаммом ва ҳуҷраи техникӣ, сохта шудааст.

Баъди ифтитоҳи варзишгоҳи марказии ноҳия дар ҳамин ҷо Президенти Ҷумҳурии Тоҷикистон муҳтарам Эмомалӣ Раҳмон дар назди роҳбарону фаъолон ва сокинони ноҳияи Мастчоҳ суханронӣ карданд.

Нахуст Пешвои миллат муҳтарам Эмомалӣ Раҳмон кулли сокинони сарбаланди вилояти Суғдро ба ифтихори бисту нӯҳумин солгарди истиқлоли давлатии Ҷумҳурии Тоҷикистон табрику таҳният гуфтанд.

Таъкид гардид, ки дар вилоят раванди ободониву созандагӣ ба хотири истиқболи ҷашни муқаддасу бузурги халқамон — сисолагии истиқлоли давлатӣ босуръат идома дорад.

Умуман, дар шаҳру ноҳияҳои вилоят то моҳи сентябри соли 2021 бунёду азнавсозии беш аз 7200 иншооту биноҳо ба нақша гирифта шудааст.

Тибқи маълумот дар вилоят то имрӯз аз ҳисоби буҷет, инчунин, соҳибкорону шахсони саховатманд ва сармоягузорони хориҷӣ сохтмон ва азнавсозии беш аз 5000 иншооти таъиноти гуногун, аз ҷумла, 254 муассисаи таҳсилоти умумиву томактабӣ, 74 иншооти соҳаи фарҳанг, 344 беморхона, бунгоҳи тиббӣ, маркази тиббӣ ва дигар муассисаҳои тандурустӣ, 731 маркази хизматрасониву савдо, 29 меҳмонхона, ҳамчунин, 17 боғи фарҳангу фароғат, 40 гулгашт, 335 толори варзиш, майдончаи варзишӣ ва майдонча барои бозии кӯдакон, 235 корхонаи истеҳсолӣ ва беш аз 2800 иншооти дигар сохта, ба истифода дода шудааст.

Дар соли 2020-ум бунёду таҷдиди қариб 1900 иншоот ба нақша гирифта шуда, дар давоми 7 моҳ 986 иншоот ба истифода дода шудааст.

Аз ҳисоби мавриди истифода қарор гирифтани иншооту корхонаҳои зикргардида дар шаҳру ноҳияҳои вилоят қариб 15 ҳазор ҷойи нави корӣ таъсис дода шудааст.

Тибқи нақшаи тасдиқгардида дар ноҳияи Мастчоҳ солҳои 2018-2021-ум бунёду азнавсозии 531 иншооту биноҳо пешбинӣ шуда, то имрӯз 369 иншоот ба истифода супорида шудааст.

Дар 29 соли истиқлоли давлатӣ, Ҳукумати мамлакат ба таъмин намудани рушди босуботи иҷтимоиву иқтисодии ноҳияи Мастчоҳ ва баланд бардоштани сатҳу сифати зиндагии мардуми ин диёр пайваста таваҷҷуҳ зоҳир карда, дар ин муддат аз ҳисоби буҷети давлатӣ 565 миллион сомонӣ маблағ ҷудо намудааст.

Илова бар ин, дар ин давра дар ноҳия 19 лоиҳаи давлатии сармоягузорӣ доир ба барқарорсозии инфрасохтор ва рушди деҳот, сохтмону муҷаҳҳаз намудани муассисаҳои таълимӣ ва тандурустӣ, бунёду таҷдид ва нигоҳдории роҳҳои мошингард, сохтмони хатҳои интиқоли нерӯи барқ ва кам кардани талафоти он, таъмини рушди устувори соҳаи пахтакорӣ ва дастгирии хоҷагиҳои деҳқонӣ ба маблағи зиёда аз 209 миллион сомонӣ амалӣ гардидааст. Инчунин, ҳоло дар ноҳия аз ҷониби Ҳукумати кишвар боз 7 лоиҳаи сармоягузории давлатӣ ба маблаги 35 миллион сомонӣ татбиқ шуда истодааст.

Дар замони соҳибистиқлолӣ дар ноҳия 17 муассисаи таҳсилоти умумӣ, 12 муассисаи томактабӣ, 39 муассисаи тиббӣ, 30 иншооти фарҳанг, 7 варзишгоҳ, 41 толори варзиш, 28 майдончаи варзиш, 2 меҳмонхона, 130 километр роҳи мошингард, 17 пойгоҳи обкашӣ ва 3 маркази хизматрасонии техникаи кишоварзӣ сохта, ба истифода дода шудааст.

Дар як муддати кӯтоҳ бо заҳмати аҳлонаи мардуми ноҳияи Мастчоҳ дар ҳудуди шаҳраку деҳот даҳҳо иншооти нав бо тарҳи миллӣ қомат афрохта, ба ин гӯшаи зебоманзари диёрамон ҳусни тоза бахшидаанд.

Мавриди зикр аст, ки ташрифи навбатии Сарвари давлат муҳтарам Эмомалӣ Раҳмон дар ноҳияи Мастчоҳ барои сокинон бобарору хотирмон мебошад, зеро танҳо зимни ин сафари корӣ 57 иншооти гуногун мавриди баҳрабардорӣ қарор дода шуд.

Президенти мамлакат муҳтарам Эмомалӣ Раҳмон бевосита дар маросими ифтитоҳи 17-тои он иштирок карданд.

Дар доираи сафари кории Пешвои муаззами миллат муҳтарам Эмомалӣ Раҳмон иншооти наву муосири мактабу корхонаҳои саноатӣ, маркази адлия, бинои ҳизбӣ, парчами давлатӣ, фабрикаи парандапарварӣ, корхонаи коркарди шир, варзишгоҳи марказӣ бо 10 ҳазор ҷойи нишаст ба истифода дода шуда, 21 километр роҳҳои маҳаллӣ мумфарш гардид. Барои таъмини пурраи аҳолӣ бо оби тозаи ошомиданӣ 90 ҷоҳи амудӣ канда шуд.

Ифтитоҳи иншоотҳо агар аз як ҷиҳат боиси пешравии иқтисодиёти ноҳия бошад, аз ҷониби дигар омили муҳими ташкили ҷойи кор ва беҳдошти сатҳи зиндагии мардум мебошад.

Дар охири суханронӣ Президенти мамлакат муҳтарам Эмомалӣ Раҳмон бори дигар ҳамаи сокинони ноҳияро бо ҷашни бузурги миллӣ — 29-солагии Истиқлоли давлатӣ ва ифтитоҳи варзишгоҳи марказӣ табрику таҳният гуфта, бо итминон иброз доштанд, ки мардум бо дарки баланди масъулият ва хештаншиносӣ корҳои ободонию созандагиро вусъат бахшида, дар ободии як гӯшаи диёр саҳми муносиб мегузоранд.

Баъди суханронии Сарвари давлат муҳтарам Эмомалӣ Раҳмон бо нишони эҳтирому самимият нисбат ба Пешвои миллат варзишгарони ҷавон барномаи ҷолиберо пешкаши ҳозирин карданд, ки бисёр хотирнишин буд.

Акнун сокинони ноҳияи Мастчоҳ бо истифода аз ин варзишгоҳи муосир метавонанд дилхоҳ чорабинии варзиширо баргузор намоянд.
Ифтитоҳи Варзишгоҳи марказии ноҳияи Мастчоҳ бо 10 ҳазор ҷойи нишаст ва мулоқот бо сокинону фаъолони ноҳия 14.09.2020

Сентябрь 14, 2020 20:01

Хабарҳои дигари ин бахш

Иштироки Пешвои миллат Эмомалӣ Раҳмон дар интихоботи Президенти Ҷумҳурии Тоҷикистон
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Соҳибкорони шаҳри Левакант 11 километр роҳро навсозӣ ва мумфарш намуданд
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар Ҳисор 375 иншооти ҷашнӣ мавриди истифода қарор гирифтанд
Пешвои миллат Эмомалӣ Раҳмон бо роҳбарону фаъолон ва сокинони шаҳри Ваҳдат мулоқот намуданд
Суханронии Пешвои миллат Эмомалӣ Раҳмон дар мулоқот бо роҳбарону фаъолон ва сокинони шаҳри Ваҳдат
Президенти мамлакат Эмомалӣ Раҳмон ҳавзҳои моҳипарварии ҶДММ «Меҳвари Душанбе»-ро дар деҳоти Ромити шаҳри Ваҳдат мавриди истифода қарор доданд
Сарвари давлат Эмомалӣ Раҳмон ҳавзҳои моҳипарварӣ ва меҳмонхонаи ҶДММ «Баҳор»-ро дар деҳоти Ромити шаҳри Ваҳдат ифтитоҳ намуданд
Пешвои миллат Эмомалӣ Раҳмон зеристгоҳи барқии 110/20/10 кВ ва хатти интиқоли барқи 04 киловолтро дар деҳоти Ромити шаҳри Ваҳдат мавриди истифода қарор доданд
Президенти мамлакат Эмомалӣ Раҳмон аз кишти зироати хоҷагиҳои деҳқонӣ дар деҳоти Чӯянгарони шаҳри Ваҳдат дидан намуданд
Сарвари давлат Эмомалӣ Раҳмон Литсейи касбии сайёҳӣ ва хидматро дар деҳоти Симиганҷи шаҳри Ваҳдат мавриди баҳрабардорӣ қарор доданд
Пешвои миллат Эмомалӣ Раҳмон бинои 10-ошёнаи истиқоматиро бо коргоҳи дӯзандагӣ ва маркази савдою хизматрасонӣ дар шаҳри Ваҳдат ифтитоҳ намуданд
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар Ёвон бо дарозии 64 метр ва иқтидори 80 тонна пули дорои аҳамияти стратегӣ ба истифода дода мешавад