Дар Душанбе Рӯзи даъватшаванда доир гардид

ДУШАНБЕ, 01.10.2020 /АМИТ «Ховар»/.  Имрӯз дар шаҳри Душанбе бахшида ба оғози мавсими  даъвати тирамоҳии ҷавонон ба сафи Қувваҳои мусаллаҳ Рӯзи даъватшаванда  доир гардид. Дар ҳамоиши мазкур  ҷавонони ноҳияҳои   Исмоили Сомонӣ, Шоҳмансур, Сино ва Фирдавсӣ, масъулини  сохторҳои марбутаи мақомоти иҷроияи ҳокимияти давлатии шаҳри Душанбе, кормандони масъули  Вазорати мудофиаи ҷумҳурӣ ва  волидайни даъватшудагон иштирок намуданд.

Муовини раиси шаҳри Душанбе Умед Гуррезода дар ҳамоиш зикр кард, ки тибқи қарори Раиси шаҳри Душанбе муҳтарам Рустами Эмомалӣ  маъракаи даъвати ҷавонон ба сафи Артиши миллӣ дар сатҳи баланди ташкилӣ  доир гардид.

«Мояи ифтихор аст, ки дар пойтахти мамлакат-шаҳри Душанбе сафи ихтиёриёни  хизмат дар сафи Қувваҳои Мусаллаҳ меафзояд ва маъракаҳои даъвати наваскарон  рангину пуршукӯҳ  мегузаранд»,- афзуд ӯ.

Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода иброз дошт, ки барои ҳар  давлати соҳибистиқлол, хосса халқу миллатҳое, ки озод будан ҷавҳари аслии ҳастии онҳоро ташкил медиҳад, хизмат дар сафи Қувваҳои мусаллаҳ қарзи асосии шаҳрвандӣ ба ҳисоб меравад. Вазъияти мураккаби ҷаҳони имрӯз аз ҳар фарди бедордил, ҷавонони бонангу номус тақозо менамояд, ки дар самти  ҳимояи истиқлоли давлатӣ ва марзу буми худ аз ҳарвақта дида, масъулияти бештар эҳсос кунад. Зеро бархурди манфиатҳои мамлакатҳои абарқудрат ва марҳилаи нави муборизаҳое, ки байни кишварҳо вуҷуд дорад, нишон медиҳад, ки ҳатто давлатҳои  садсолаҳо мавҷуда дар пайи аз байн рафтан ҳастанд. Миллатҳо дар вазъияти хеле мураккаби ноором мебошанд. Аз ин рӯ имрӯз вақти он расидааст, ки пайи ҳифзи Ватани соҳибистиқлоламон аз ҳарвақта дида бештар талош варзем.

«Хизмат дар сафи Қувваҳои мусаллаҳ барои ҳар фард мактаби ташаккули шахсият аст. Волидоне, ки имрӯз дар ин ҳамоиш ҳузур доранд, бояд дуруст дарк кунанд, ки фарзанде, ки дар сафи Қувваҳои мусаллаҳ хизмат мекунад, пеш аз ҳама, дар баробари баланд бардоштани ҳифзи ифтихори милливу ватандӯстӣ, такомули ҷисмонии неруи зеҳнӣ  ба қадри падар,  модар ва Ватан мерасад. Дар фарҳанги ҳазорсола ташаккулёфтаи миллати тоҷик ду вожа ба ҳамдигар тавъаманд, ки ин Ватан – Модар мебошад. Дар назар бояд дошт, ки ҳар нафаре, ки фарзанди худро аз хизмат дар сафи Қувваҳои мусаллаҳ бозмедорад ва ё ӯро ба анҷоми ин амал талқин намекунад,  ҳеҷ вақт умед надошта бошад, ки ин фарзанд оянда ба қадри падару модари худ мерасад»,- гуфт Абдулло Раҳмонзода.

Ҳамчунин дар ҳамоиш зикр гардид, ки хизмат ба Ватан-Модар қарзи фарзандии ҳар ҷавонмард ба ҳисоб меравад. Ҳамасола Ҳукумати мамлакат ҷиҳати  фароҳам овардани шароити созгор ба сарбозону афсарон пайваста  тадбирҳои мақсаднок меандешад.

Ҳоло бо саъю талошҳои пайвастаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон  муҳтарам Эмомалӣ Раҳмон барои фаъолияти рӯзмарраи хизматчиён дар қисмҳои ҳарбӣ шароити зарурии маишиву моддӣ муҳайё карда шуда, дар кулли воҳидҳои низомӣ имрўз афсарони касбии ботаҷриба ҷиҳати баланд бардоштани малакаи ҳарбиву ҷисмонии ҷавонон, тарбияи онҳо дар рӯҳияи ватандўстӣ, садоқат ба марзу бум фаъолияти босамар менамоянд.

Ҳамчунин дар маросими Рӯзи даъватшаванда ба наваскарон дар вазъияти тантанавӣ  шаҳодатномаи ронандагӣ тақдим гардид ва баҳри болидахотирии онҳо барномаи консертӣ доир шуд.

Ёдовар мешавем, ки ҳамасола 1 октябр  дар саросари шаҳру ноҳияҳои мамлакат маъракаи даъвати тирамоҳии ҷавонон ба сафи Қувваҳои мусаллаҳи Ҷумҳурии Тоҷикистон оғоз гардида, то охири моҳи ноябр идома меёбад. Имсол шаҳрвандони солҳои таваллуди 1993-2002 ба хизмати ҳарбӣ сафарбар мегарданд.