ИМРӮЗ – РӮЗИ УМУМИҶАҲОНИИ МУБОРИЗА БО ИЛТИҲОБИ ШУШ. Аз ин беморӣ кӯдакон нисбат ба калонсолон бештар азият мекашанд
ДУШАНБЕ, 12.11.2020 /АМИТ «Ховар»/. Ҳамасола 12 ноябр бо ташаббуси Эътилофи ҷаҳонии зидди пневмонияи кӯдакона Рӯзи мубориза бо бемории илтиҳоби шуш таҷлил карда мешавад. Бемории илтиҳоби шуш, яъне пневмония бемории сироятии шуш буда, одатан кӯдакон, пиронсолон ва одамоне, ки системаи иммунии суст доранд, дучори он мегарданд. Ба иттилои мутахассисони соҳаи тандурустӣ, аз бемориҳои илтиҳоби шуш бештар кӯдакон азият мекашанд ва маҳз ин беморӣ сабаби асосии марги ноболиғон дар саросари ҷаҳон мебошад. Бемории мазкур ҳамасола 1.1 миллион кӯдаки то панҷсоларо мекушад, ки ин нисбат ба бемории СПИД, вараҷа ва сурхча зиёд мебошад.
Мақсад аз таҷлили ин рӯз пешгирӣ аз бемории илтиҳоби шуш ва огоҳонидани мақомоти давлатӣ, мутахассисони соҳаи тандурустӣ ва донорҳои эҳтимолӣ мебошад, ки барои баланд бардоштани иттилоотонии аҳолӣ саҳм мегузоранд.
Тибқи маълумот, соли 2009 Созмони Умумиҷаҳонии Тандурустӣ дар якҷоягӣ бо ЮНИСЕФ “Нақшаи Глобалии чорабиниҳо оид ба пешгирӣ ва мубориза бо илтиҳоби шуш» эълон кард, ки ҳадафи он низ пурзӯр кардани мубориза бо пневмония ва ташхису табобати беморӣ мебошад.
Тибқи маълумоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, дар мамлакат ҳамасола аз 7 то 16 ҳазор ҳолати гирифторӣ ба пневмония ба қайд гирифта мешавад, ки аз ин шумора аз 130 то 650 нафар мефавтанд. Дар 4 моҳи соли равон дар Тоҷикистон 5 ҳазору 489 ҳолати гирифторӣ ба бемории пневмония ба қайд гирифта шудааст, ки нисбат ба ҳамин давраи соли гузашта 850 ҳолат зиёд мебошад. Соли 2019 дар Тоҷикистон 12 ҳазору 802 нафар гирифтори илтиҳоби шуш сабти ном шуданд, ки аз онҳо 129 нафар фавтиданд.
Тавре мудири кафедраи микробиология, иммунология ва вирусологияи Донишгоҳи давлатии тиббии Тоҷикистон ба номи Абуалӣ ибни Сино, профессор Саидбек Сатторов ба хабарнигори АМИТ «Ховар» иброз дошт, пневмония як шакли сирояти шадиди роҳи нафас ба шуш буда, микроорганизмҳо, аз ҷумла вирус, бактерия ва замбӯруғҳо метавонанд ин бемориро ба вуҷуд оранд.
Ба зикри номбурда, аломатҳои асосии беморӣ сулфаи доимӣ, дарди қафаси сина, табларза, якбора бад шудани вазъи бадан, хунукхӯрӣ ва нафаскашии душвор мебошанд. Имрӯзҳо коронавируси COVID-19 ва пневмония хеле зуд ба ҳам омехта шуда, нишонаҳои шабеҳ низ доранд. Аммо, инҳо бемориҳои тамоман гуногун буда, танҳо дар шароити лабораторӣ ташхис карда мешаванд.“Барои гирифтор нашудан ба пневмония дар вазъияти имрӯза қоидаҳои гигиенаи шахсиро риоя кардан лозим буда, бидуни зарурат ба ҷойҳои серодам набояд рафт”,-иброз дошт Саидбек Сатторов.
Ёдовар мешавем, ки бо сабаби паст будани масуният аксар вақт пиронсолон ва кӯдакон ба бемории илтиҳоби шуш гирифтор мешаванд. Тибқи таҳқиқот, занон камтар ба ин беморӣ дучор мегарданд.
Холисаи АСОМИДДИН,
АМИТ «Ховар»
Сарвари давлат: «Ҳар як фарди ҷомеа вазифадор аст, ки моҳияту аҳаммияти Конститутсияро ба фарзандони худ ҳанӯз аз хурдсолӣ фаҳмонад»
Эмомалӣ Раҳмон: «Маҳз ба шарофати Конститутсия ва амалӣ шудани меъёрҳои он дар Тоҷикистон фазои орому осуда муҳайё гардид»
Президенти Тоҷикистон: «Конститутсия соҳибистиқлолии халқи моро ба расмият дароварда, асосҳои бунёдии ҷомеа ва давлати навини тоҷиконро муайян намуд»
КОНСТИТУТСИЯ — ШАҲОДАТНОМАИ ХАЛҚИ ТОҶИКИСТОН. Иқтибосҳо аз суханрониҳои Президенти Тоҷикистон
Президенти Тоҷикистон: «Гузариш ба иқтисоди «сабз» барои ҷомеаи ҷаҳонӣ баҳри ҳаллу фасли масоили иҷтимоӣ имконоти зиёд фароҳам меоварад»
ЭЪТИРОФИ БАЙНАЛМИЛАЛӢ. «Lonely Planet» Тоҷикистонро байни самтҳои беҳтарини сайёҳии ҷаҳон ҷой дод
Сарвари давлат: «Меҳргон яке аз муҳимтарин ҷашнҳои табиӣ ва фарҳангии мо – тоҷикон аст»
Президенти Ҷумҳурии Тоҷикистон Эмомалӣ Раҳмон бо медали «Барои хизматҳо дар рушди ҳамкории башардӯстона» сарфароз гардонида шуданд
ТОҶИКИСТОН — МИЗБОНИ ЧОРАБИНИҲОИ МУҲИМИ БАЙНАЛМИЛАЛӢ. Интихоби Душанбе чун макони баргузории ин чорабиниҳои муҳим ба таҷриба, эътибор ва нуфузи байналмилалии мамлакат асос ёфтааст
Вуруди Резервати биосферии «Ромит» ба Шабакаи ҷаҳонии мамнуъгоҳҳои ЮНЕСКО — рӯйдоди муҳим дар соҳаи экологии Тоҷикистон
ДИПЛОМАТИЯИ ТОҶИКИСТОН: АЗ СУХАНРОНИИ ТАЪРИХӢ ТО ТАШАББУСҲОИ ГЛОБАЛӢ. Эҳдо ба Рӯзи кормандони хизмати дипломатии Тоҷикистон
Президенти Тоҷикистон: «Таъсиси Маркази минтақавии зеҳни сунъиро дар шаҳри Душанбе салоҳи кор мешуморем»
