Дар Донишгоҳи давлатии Данғара 83 нафар донишҷӯ аз рӯи ихтисоси саёҳат ва меҳмондорӣ ба таҳсил фаро гирифта шудаанд

ДУШАНБЕ, 14.12.2020 /АМИТ «Ховар»/. Масъалаҳои баланд бардоштани сатҳи касбияти мутахассисони соҳаи сайёҳӣ,   ҷалби   донишҷӯён барои таҷрибаомӯзӣ дар дигар муассисаҳои олии таълимии ҷумҳурӣ ва хориҷи мамлакат дар ҷамъомаде, ки дар Донишгоҳи давлатии Данғара бо иштироки Раиси Кумитаи рушди сайёҳии назди Ҳукумати Ҷумҳурии Тоҷикистон Тоҷиддин Ҷӯразода ва Ректори Донишгоҳи давлатии Данғара, профессор Нуралӣ Шоҳиён  доир гардид, баррасӣ шуданд.

Зикр гардид, ки дар факултети идораи давлатӣ, ҳифзи ҳуқуқ ва рушди сайёҳии Донишгоҳи давлатии Данғара 83 нафар донишҷӯ аз рӯи  ихтисоси   саёҳат ва меҳмондорӣ  ба таҳсил фаро гирифта шудаанд.

Саноати сайёҳии замони муосир яке аз соҳаҳои рушдёбанда ва сердаромади иқтисоди ҷаҳонӣ арзёбӣ мегардад. Бинобар ин, дар ин самти тайёр кардани мутахассисони ҳирфаию ихтисосманди соҳа ва васеъ намудани арзҳои меҳмоннавозӣ, саҳм гузоштан дар беҳтар намудани сифати хизматрасониҳо барои таҳкими симои ҷумҳурӣ ҳамчун давлати сайёҳии байналмилалӣ  ҳадафҳои  муҳими  Кумита маҳсуб мешаванд.