Дар Кӯлоб 1000 бех дарахт, 10 ҳазор гули лола ва зиёда аз 15 ҳазор бех гули садбарг шинониданд

КӮЛОБ, 15.12.2020 /АМИТ «Ховар»/. Дар шаҳри Кӯлоб ба шарафи ҷашни 30-солагии Истиқлолияти  давлатии Ҷумҳурии Тоҷикистон ва сарсабзу хуррамгардонӣ мавсими ниҳолшинонӣ оғоз гардид.  Рӯзҳои истироҳатӣ дар хиёбону гулгашт ва кӯчаю маҳаллаҳои шаҳр сокинон ва кормандони корхонаю ташкилот ба ҳашари умумишаҳрӣ баромада, ба нарм кардани бехи дарахтон ва шинонидани ниҳолҳои ороишию сояафкан машғул гардиданд. Дар ин ҳашари умумишаҳрӣ қариб ду ҳазор нафар сокинон иштирок намуда, беш аз 1000 бех ниҳолҳои ороишию сояафкан, 10 ҳазор гули лола ва зиёда аз 15 ҳазор бех гули садбарг шинониданд.

Тавре мухбири АМИТ “Ховар” иттилоъ медиҳад, дар қитъаи ниҳолшинонии Корхонаи фаръии ниҳолшинонӣ ва кабудизоркунии шаҳр зиёда аз якуним миллион гули садбарг қаламча карда шудааст, ки бо тавсияи мутахассисон охири моҳи феврал ва аввали моҳи март дар хиёбону гулгашт ва назди идораю ташкилот шинонида мешаванд.

Бино ба иттилои бахши ҳифзи муҳити зисти шаҳри Кӯлоб, соли 2021 мувофиқи  дурнамо бояд дар шаҳру деҳоти Кӯлоб 12 ҳазор бех дарахтони сояафкан, 7 ҳазор бех ниҳолҳои  ҳамешасабз ва 5 ҳазор бех ороишӣ шинонида шаванд. Инчунин барои зебою пурнакҳат гардонидани шаҳру деҳот 1 миллиону 625 ҳазор бех гулҳои гуногун шинонида мешаванд.

Муассисаи ниҳолшинонӣ ва сабзазоркунии шаҳри Кӯлоб  дар майдони беш аз 3 гектар ниҳолхона дошта,  барои дар сатҳи баланд доир намудани маъракаи дарахтшинонӣ  ҳамасола  ниҳолҳои ороишию сояафкан ва ҳамешасабз парвариш менамояд. Инчунин корхонаю ташкилот имкон доранд аз боғи ботаникии шаҳри Кӯлоб чунин ниҳолҳоро дастрас намоянд.