Дар Тоҷикистон сатҳи таваллуд баланд шудааст

ДУШАНБЕ, 01.12.2020 /АМИТ «Ховар»/. Аз моҳи январ то октябри соли 2020 дар Тоҷикистон нисбат ба ҳамин давраи соли 2019 афзоиши таваллуд ба қайд гирифта шудааст, хабар медиҳад Sputnik бо истинод ба Агентии омори назди Президенти Ҷумҳурии Тоҷикистон.

Дар 10 моҳ дар мамлакат 166,6 ҳазор кӯдак таваллуд шудаанд. Дар ҳамаи вилоятҳо ва минтақаҳои Тоҷикистон сабти таваллуд дар давраи муқарраркардаи қонун 2,4% афзудааст.

Тибқи ҳисобҳои пешакӣ, зариби (коэффитсиенти) умумии таваллуд ва фавт мутаносибан 23,7 ва 4,1 -ро ба сари 1000 нафар аҳолӣ ташкил додааст.

Ба иттилои Агентии омор, миқдори фавти кӯдакон низ дар Тоҷикистон афзудааст. Аз аввали соли 2020 дар мамлакат 28,9 ҳазор нафар одамон фавтидаанд, ки 1,6 ҳазор нафарашон кӯдакони то яксола мебошанд.

Сабти фавтҳо дар ҳама минтақаҳо 15,7 фоиз афзуда, 28,9 ҳазор нафарро ташкил дод.

Ёдовар мешавем, ки мутобиқи маълумот, то аввали моҳи ноябр аҳолии Тоҷикистон аз 9,4 миллион нафар зиёд шуд. Ин нисбат ба 10 моҳи соли гузашта 2% зиёдтар аст.

Минтақаи аз ҳама сераҳолии ҷумҳурӣ вилояти Хатлон мебошад. Дар ин ҷо зиёда аз 3,4 миллион нафар одамон зиндагӣ мекунанд. Дар вилояти Суғд беш аз 2,7 миллион, дар ВМКБ — 230,4 ҳазор, дар ноҳияҳои тобеи ҷумҳурӣ — беш аз 2,2 миллион ва дар Душанбе — 871,6 ҳазор нафар ба ҳисоб гирифта шудааст.

                                     АКС:  © Sputnik / Алексей Сухоруков