Дар Турсунзода 1 миллиону 957 ҳазор сомонӣ қарзи истифодаи нерӯи барқ пардохт гардид

ТУРСУНЗОДА, 30.12.2020 /АМИТ «Ховар»/. Аз  15 то 28 декабри соли равон дар шаҳри Турсунзода  1 миллиону 957 ҳазор сомонӣ қарзи истифодабарии барқро аз аҳолӣ ва корхонаҳои тиҷоратию истеҳсолӣ ҷамъоварӣ намуданд. Нисбат ба 36 нафар сокини шаҳр  барои ғайриқонунӣ истифодабарии қувваи барқ санадҳои қуқуқвайронкунии маъмурӣ тартиб дода, онҳоро ба маблағи 25 ҳазору 515 сомонӣ ҷарима намуданд.

Мудири бахши нақлиёт ва коммуникатсияи шаҳри Турсунзода Шаҳбози Абдусаттор ба  хабарнигори АМИТ «Ховар» Субҳониддини Маҳмуд  иброз дошт, ки дар ҳудуди шаҳри Турсунзода 57 адад коргоҳҳои нонпазӣ ва 9 адад ҳаммомҳои замонавӣ мавҷуд мебошанд, ки баҳри сарфакорона истифода бурдани неруи барқ бо ҳезум ва ангишт фаъолияти кориро ба роҳ монда, имрӯзҳо дар сатҳи олӣ ба сокинону меҳмонон ҳизмат мерасонанд. Айни замон дар ҳудуди шаҳр зиёда аз 100 нуқтаи фурӯши ангишт ва маводи сӯзишворӣ мавҷуд аст, ки шаҳрвандон сари вақт бо маводи сӯзишворӣ дастрасӣ пайдо карда метавонанд. Фаъолияти нуқтаҳои ангишту сӯзишворӣ дар сарфа намудани қувваи барқ таъсири калон дорад.

Таъкид менамоем, ки  дар асоси дастуру супоришҳои Президенти  мамлакат гурӯҳҳои корӣ дар шаҳри Турсунзода оид ба  истифодаи сарфакоронаву боинсофона ва ба таври қатъӣ пешгирӣ кардани исрофкорӣ корҳои фаҳмондадиҳӣ гузаронида истодаанд, ки  натиҷаҳои хуб нишон дода истодаанд. Аз ҷумла,  дар ин муддат сокинони шаҳри Турсунзода 211 ҳазору 280  киловатт-соат қувваи барқро сарфа намудаанд.