Дар Восеъ волонтёрон оид ба сарфакорона истифода бурдани неруи барқ ва пешгирии талафоти он корҳои фаҳмондадиҳӣ мебаранд

ДУШАНБЕ, 19.12.2020 /АМИТ «Ховар»/. 20 нафар волонтёрон дар ноҳияи Восеъ миёни аҳолӣ   оид ба сарфакорона истифодабарии неруи барқ ва пешгирии  талафоти он, инчунин оид ба  роҳ надодан ба  паҳншавии бемории сироятии коронавирус, омодагӣ ба  ҷашни байналмилалии Наврӯз, аз ҷумла сабзгардонии макони зист,  вусъат додани корҳои ободонию сохтмонӣ бахшида ба 30-солагии Истиқлоли давлатии Ҷумҳурии Тоҷикистон корҳои тарғиботию фаҳмондадиҳӣ  мебаранд.

Тавре аз мақомоти иҷроияи ҳокимияти давлатии ноҳияи Восеъ ба АМИТ «Ховар» хабар доданд, муовини Вазири молияи Ҷумҳурии Тоҷикистон  Карим Гулмуродзода бо фаъолони ноҳия  ҷиҳати расонидани дастуру ҳидоятҳои Пешвои миллат, ки 15 декабри соли 2020 дар машварати корӣ баён доштанд, вохӯрӣ анҷом дод.

Карим Гулмуродзода  аз масъулини ноҳия даъват ба амал овард, ки миёни аҳолӣ оид ба масъалаҳои зикршуда корҳои фаҳмондадиҳиро  тақвият бахшанд.

«Агар волонтёрон дар кӯчаву маҳаллаҳо ва деҳаҳои  ноҳия  аз рӯи усули “хона ба хона”  бо риояи фосилавӣ бо шаҳрвандон суҳбат ороста, моҳияти аслии масъалаҳои зикршударо фаҳмонанд ва ба суолҳои сокинон дар ин маврид посухҳои саҳеҳ диҳанд, он гоҳ ин амал  натиҷаи муфид хоҳад дод »,- тавсия дод номбурда.

Ёдовар мешавем, ки шурӯъ аз 10 декабр Ситоди ягонаи ҷумҳуриявӣ вобаста ба гузаронидани корҳои фаҳмондадиҳӣ дар ҳар шаҳру ноҳия, истифодаи сарфакоронаи неруи барқ ва ошкор намудани ҳолатҳои тасарруфи ғайриқонунии неруи барқ  фаъолияти худро дар миқёси ҷумҳурӣ оғоз намуд.

Дар асоси дастури Ҳукумати Ҷумҳурии Тоҷикистон таҳти роҳбарии Вазири корҳои дохилӣ, генерал-полковники милитсия Рамазон  Раҳимзода 9 декабр ҷаласаи селектории якҷояи намояндагони сохторҳои Вазорати корҳои дохилӣ, Кумитаи давлатии амнияти миллӣ, Прокуратураи генералӣ, Агентии назорати молиявӣ ва мубориза бо коррупсия, кумитаҳои кор бо ҷавонон ва варзиш, кор бо занон ва оилаи назди Ҳукумати Ҷумҳурии Тоҷикистон, ҳамчунин намояндагони Вазорати энергетика ва ШСХК «Барқи Тоҷик» доир гардид.

Зимни ҷаласа ҷиҳати аз 10 декабр бардоштани маҳдудияти истифодаи неруи барқ дар ҳудуди ҷумҳурӣ ва сарфакорона истифода намудани қувваи барқ аз ҷониби шаҳрвандон дар давраи зимистон ибрози назар карда шуд.

Дар ҷаласа аз ҷониби намояндагони тамоми сохторҳои иштирокдор Ситоди ягонаи ҷумҳуриявӣ созмон ёфт.