ДАРАХТ БИНШОН! Бо ташаббуси ташкилоти ибтидоии ҲХДТ дар шаҳри Ваҳдат 5800 бех ниҳол шинонида шуд

ВАҲДАТ, 10.12.2020 /АМИТ «Ховар»/. Бо ташаббуси ташкилоти ибтидоии Кумитаи иҷроияи Ҳизби Халқии Демократии Тоҷикистон дар шаҳри Ваҳдат бахшида ба 26-солагии таъсиси ҲХДТ таҳти унвони «Ватан, ҳар гӯшаатро сабз хоҳем кард!» аксияи ниҳолшинонӣ баргузор шуд. Дар он аъзои фаъоли ҳизб аз ҳар ташкилоту муассиса дар талу теппаҳои шоҳроҳи Душанбе-Ваҳдат зиёда аз 5800 бех дарахтони ороишию ҳамешасабзро бо меҳри ватандӯстона шинониданд.

Раиси Кумитаи иҷроияи ҲХДТ дар шаҳри Ваҳдат Руқия Раҳматзода ба хабарнигори АМИТ «Ховар» гуфт, ки созандагию бунёдкорӣ вазифаи мо, ҳизбиён мебошад.

Бо дастгирии мақомоти иҷроияи ҳокимияти давлатии шаҳри Ваҳдат дар аксияи ниҳолшинонӣ кормандони 11 ҷамоати шаҳраку деҳот, муассисаҳои касбӣ, соҳаи маориф, тандурустӣ,  фаъолони ҳизб, собиқадорон, соҳаи кишоварзӣ ва хизматчиёни давлатӣ фаъолона ширкат намуда, талу теппаҳои шоҳроҳи Душанбе-Ваҳдатро бо ниҳолҳои ҳамешасабзу ороишӣ оро доданд.

Ин амали сокинони шаҳри Ваҳдат идома ёфта, дар назар аст  то охири мавсим дарахтони зиёд шинонида шуда, ба ин восита ҳама минтақаҳои мамлакат сарсабзу хуррам гарданд.