Гурӯҳи кории Кумитаи занон ва оила аз корхонаи дӯзандагии «Гулдаста»-и ноҳияи Роштқалъа дидан намуд

 ДУШАНБЕ, 05.12.2020 /АМИТ «Ховар»/. Тавре пештар иттилоъ дода будем, гурӯҳи кории Кумитаи кор бо занон ва оилаи назди Ҳукумати Ҷумҳурии Тоҷикистон таҳти роҳбарии муовини Раиси Кумита Зарина Абдулмаинзода бо мақсади доир намудани суҳбату вохӯриҳои судманд ва баррасии фаъолияти соҳибкории занону бонувон бо сафари корӣ дар Вилояти Мухтори Кӯҳистони Бадахшон қарор дорад.

Дар идомаи суҳбату вохӯриҳои судманд ва баррасии фаъолияти соҳибкории занону бонувон гурӯҳи кории Кумитаи занон ва оила аз корхонаи дӯзандагии «Гулдаста»-и ноҳияи Роштқалъаи ВМКБ дидан намуд.

Корхонаи дӯзандагии «Гулдаста» бо дастгирии бевоситаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо 100 ҷойи кор ба истифода дода шуда, айни замон дар он зиёда аз 40 нафар занону бонувони ноҳия фаъолият доранд.

Ҳамзамон дар ноҳияи Роштқалъа бо иштироки роҳбарони муассисаҳои таълимӣ, раисони ҷамоатҳо, фаъолзанон, раисони маҳаллаҳо аз ҷамоати Қурбоншо Гадоалиеви ноҳия бо мақсади пешгирии ҳолатҳои номатлуб дар байни занону ҷавонон, омӯхтани илму дониш ва баланд бардоштани ҳисси ватандӯстию ифтихори миллӣ мулоқоти судманд баргузор гардид.